Ró Berlin Nakroma. Imajen Espesiál.

DILI, 20 dezembru (TATOLI) – Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves, hateten manutensaun ró Nakroma iha Surabaya- Indonézia ne’ebé halo husi kompañia Ben Santoso atinje ona porsentu 98. Nune’e sei to’o Timor-Leste iha 28 dezembru.

“Importante mak manutensaun ba  ró  Nakroma hotu ona, ohin dadeer mós ha’u update ró arranka husi Surabaya iha loron 24  no to’o Timor-Leste iha 28 dezembru”, Prezidente APORTIL  informa ba Ajénsia TATOLI iha Portu Dili, ohin.

Prezidente APORTIL, Flavio Cardoso Neves. Imajen/Antonio Goncalves

Nia espera katak ró Nakroma mai iha 15 dezembru, maibé  labele tanba presiza hadi’a tan nia pesa balun iha tasi-okos, mas  agora finaliza ona, ne’ebé sei arranka husi Surabaya  mai Timór iha semana oin.

Iha prosesu manutensaun, Flávio Cardoso Neves dehan  ekipa téknika na’in-lima husi APORTIL halo monitorizasaun atu hatene nia sasán saida mak troka no monta foun ne’e saida.

“Ha’u haruka ekipa atu akompaña kompañia hodi hadi’a de’it  pesa ka ekipamentu balun ne’ebé presiza  atu to’o Timor-Leste ho kondisaun di’ak”, katak.

Prezidente APORTIL ne’e adianta, ró Nakroman mai trade uitoan, tanba APORTIL ho objetivu ida atu hadi’a kondisaun ho di’ak atu ró to’o mai labele iha fallansu ruma hodi gasta osan arbiru.

Hatán ba orsamentu adisionál, nia salienta daudaun orsamentu ne’e nafatin ho montante rihun $226 ne’ebé asina ho kompañia Ben Santoso, mas posibilidade iha ona orsamentu adisionál.

“Adisionál seidauk fiksu, maibé posibilidade iha adisionál mas ita hein dokumentu husi Kompañia ne’ebé hetan akompañamentu husi ekipa APORTIL to’o mai mak ita haree no analiza dokumentu ne’e hodi hatene orsamentu adisionál ne’e hira”, haktenik.

Nia dehan, dokumentu ne’e mai, presiza analiza didi’ak tanba Diresaun Nasionál Transporte Marítima hamutuk ho Biro Klasifikasaun Indonézia halo inspesaun iha ró Nakroma katak téknikamente ba manutensaun ró ne’e mákina sira, eletrisidade, sistema navegasaun no materiál salva vida, pinta fali no hasai ferrujen sira iha ró nia okos.

“Ita iha lista ba manutesaun, ne’ebe kuandu troka balun mas iha lista laiha ita fiar mak ita-nia ekipa APORTIL na’in-lima atu aprova no selu, mas ha’u fiar osan adisional la boot liu”, espera.

APORTIL kontratu ho kompañia Ben Santoso husi Indonézia bá halo manutensaun iha Surabaya-Indonézia iha 30 setembru ho totál orsamentu $226.000.

Nune’e, Nia dehan Koordena ona ho ró Sukses atu aumenta frekuénsoa operasaun ba Oe-cusse no Ataúro atubele fasilita movimentu populasaun nian durante Natál no tinan foun.

“Ha’u koordena ho ró  Sucesso atubele  aumenta movimentu tanba tuir oráriu kada semana dala rua bá Oe-Cusse, mas agora aumenta dala ida no bá Ataúro ne’e di’ak hela tanba ró barak”, adianta.

Notísia relevante : Manutensaun Ró Nakroma Atinje Ona Porsentu 85

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here