Prezidente TLPU, Manuel Pinto ho Sekretariu Jerál, Horacio Babo. Imajen/Eugénio Pereira

DILI, 21 dezembru 2019 (TATOLI)-Kongresu nasionál asosiasaun jornalista Timor-Leste Press Uniaun (TLPU) durante loron rua, sesta-sábadu (20-21/12/2019), iha salaun Otél Golgota, Dili, hili ona Manuel Pinto nu’udar  prezidente TLPU ba periodu 2020-2024.

Notísia Relevante : TLPU Hola Responsabilidade ba Violasaun Hasoru Direitu Jornalista

Estrutura TLPU periodu 2020-2024, ne’ebeé lidera husi Manuel Pinto halo konferensia imprensa hafoin rezultadu kongresu nasional TLPU ba dalimak, sábadu (21/12/2019). Imajen/Eugénio Pereira

Membru TLPU hamutuk nain 169 ne’ebé partisipa iha kongresu ne’e, ejerse sira nia direitu liuhusi eleisaun ba estrutura TLPU periodu tinan haat oin mai, ho votu 59 ba pakote númeru ida (I) ne’ebé kompostu husi prezidente  Manuel Pinto, primeiru vise prezidente  ba asuntu relasaun esterna, Cesar Mali, segundu vise prezidente ba asuntu interna, Raimundo Oki, Sekretáriu Jerál Horacio Babo, terseiru vise prezidente apoiu  relasaun institusionál, Jerónimo Amaral, Sekretáriu Jerál, Horácio Babo, primeiru adjuntu Sekretáriu Jerál ba asuntu apoiu Implementasaun Planu no Polítika, Rafael Belo,  segundu adjuntu Sekretáriu Jerál ba asuntu apoiu Tékniku Implementasaun Planu no Lojístika, Orlando Pereira, terseiru Adjunta Sekretáriu Jerál III ba Promosaun Igualdade Jéneru, Armandina Moniz no Tezoureiru Venidora Oliveira.

Iha kongresu ne’e, aprezenta pakote kandidatura tolu, maibé pakote rua seluk la konsege rekolla votu maioria kongresista sira nian. Nune’e, segundu pakote (II) ne’ebé Jordão Henrique hanesan kandidatu prezidente hetan votu 44 no terseiru (III) pakote ne’ebé lidera husi João Guterres hetan votu 48.

Iha eleisaun ne’ebé la’o iha ambiente demokrasia partisipativu ne’ebé lidera husi prezidente meza, Domingos Saldanha, identifika mós votu nulu tolu (3).

Prezidente eleitu Manuel Pinto, nu’udar vise prezidente iha Ajénsia Notisioza Timor-Leste  TATOLI.IP (Institutu Públiku) (www.tatoli.tl) ne’e hato’o nia agradesimentu boot tebes ba konfiansa husi membru TLPU hotu, inklui inisiadór no fundadór sira ne’ebé dedika ona konfiansa ba nia ho nia estrutura atu serve TLPU.

“Ami lakohi promete, maibé ami hakarak justifika iha asaun. Ami mós husu nafatin apoiu husi estrutura sesante ba susesu implementasaun programa hotu ba TLPU nia di’ak,” Manuel Pinto deklara liuhusi konferénsia imprensa hafoin rezultadu kongresu.

Tuir planu, estrutura foun TLPU ne’e  sei simu pose iha fulan Janeiru 2020, hodi lansa mós programa prioridade TLPU nian.

Notísia Relevante : TLPU Partisipa iha Kongresu Jornalista Mundiál

Atribui Sertifikadu Rekoñesimentu ba Inisiadór TLPU

Estrutura TLPU periodu 2016-2020, ne’ebé lidera husi Francisco Belo Simões da Costa, atribui sertifikadu rekoñesimentu ba inisiadór no fundadór TLPU nain neen (6) iha ámbitu kongresu nasionál TLPU ba dalimak, sábadu (21/12/2019). Imajen/Eugénio Pereira

Iha loron hanesan, estrutura TLPU periodu 2016-2020 ne’ebé kompostu husi Prezidente Francisco Belo Simões da Costa, Sekretáriu Jerál Manuel Pinto, atribui sertifikadu rekoñesimentu ba inisiadór no fundadór TLPU hanesan, Domingos Saldanha, José António Belo, Lirio da Fonseca Jordão Henrique, Cesar Mali no Nelio Isaac Sarmento (auzente).

Francisco Belo Simões da Costa, hateten, sertifikadu rekoñesimentu ne’e hanesan onra boot ne’ebé membru TLPU tomak hamutuk ho nia estrutura  atribui hodi hatudu respeitu no agradese ba inisiadór no fundadór sira hotu TLPU nian, ne’ebé inísiu kedas harii TLPU, akompaña TLPU no dedika sira nia tempu hotu ba TLPU hodi ohin TLPU hamriik metin, unidade no buras ba nafatin.

TLPU sai mós hanesan membru permanente iha IFJ (International Federation of Journalists) ne’ebé tinan-tinan TLPU iha direitu votu rua iha kongresu IFJ nian ne’ebé nia sekretariadu permanente iha Bruxelas.

Membru TLPU mai husi jornalista ne’ebé loron-loron halo atividade jornalístiku no servisu ba órgaun komunikasaun sosiál (eletrónika no imprime) ne’ebé eziste iha rai laran, inklui jornalista Timor-oan  ne’ebé sai hanesan korrespondente ba ajénsia internasionál sira, hanesan REUTERS, EPA, AP, AFP, Kyodo News no seluk-seluk tan.

Kongresu TLPU ba dalimak durante loron rua  ne’e, hetan apoiu fundu husi Governu, liuhusi fundu transferénsia públiku, Sekretáriu Estadu Komunikasaun Sosiál (SEKOMS) inklui apoiu balun husi IFJ.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here