DILI,20 dezembru 2019 (TATOLI)-Ministériu Justisa, iha tinan 2019 ne’e la konsege aprezenta esbosu lei kona-ba organizasaun judisiária ba konsellu ministru hodi deskute no aprova.
Ministru Justisa, Manuel Carcéres da Costa, informa nia parte adia aprezentasaun ne’e tanba governu sei konsentra ba deskusaun orsamentu jerál estadu 2020, iha parlamentu nasionál.
Notísia Relevante:Lei Organizasaun Judisiária Importante Reforma Setór Justisa
Governante dehan, ekipa tékniku hosi Konsellu Koordenasaun Justisa (KKJ) dadaun ne’e finaliza ona redasaun finál ba esbosu lei ho ninia artigu kuaze 102, maibé la konsege aprezenta hodi adia ba tinan oin.
Notísia Relevante:Sei Elimina Artigu Balun iha Proposta Lei Organizasaun Judisiáriu
Esbosu lei ne’e sei apoiu Governu liliu Ministériu Justisa atu halo mapamentu ba dezenvolvimentu setór Justisa ida di’ak liután.
“Ho nune’e iha tinan oin mak sei aprezenta ba iha Konsellu Ministru,”katak Ministru, Manuel Carcéres ba TATOLI, iha Palásiu Governu,Ohin.
Jornalista:Nelson de Sousa
Editór:Francisco Simões
