Lei Organizasaun Judisiária Importante Reforma Setór Justisa
DILI, (TATOLI) – Prezidente Konsellu Koordenasaun Justisa atuál Ministru Justisa, Manuel Cárceres da Costa, hatete presiza lei organizasaun judisiária nu’udar baze legál hodi gia instituisaun sira atu la’o tuir ida-idak nia misaun, kuandu atu reforma setór judisiáriu.
“Tanba laiha lei ne’e, ita la hatene atu halo saida, atu harii tribunál hira, loke tan kámara ne’e hira, atu loke tribunál distritál sira ne’e atu la’o oinsá no ministériu públiku atu funsiona oinsá, sira ne’e hotu tama iha enkuadramentu ida bolu naran organizasaun judisiária”, dehan ministru ba jornalista sira hafoin lidera enkontru entre Konsellu Koordenasaun Justisa iha Ministériu Justisa, tersa, (19/3/2019).
Konsellu ne’e lidera hosi husi Ministériu Justisa nu’udar prezidente ho ninia membru sira kompostu hosi Prezidente Tribunál Rekursu, Prokuradór Jerál Repúblika, Defensoria Públika, Diretór Nasionál Polísia Servisu Investigasaun Kriminál (PSIK), reprezentante Advogadu Timor-Leste.
“Ohin ami hasoru malu atu ko’alia kona-ba ezbosu lei organizasaun judisiária Timor-Leste”, tenik Ministru Justisa ne’e.
Ministériu justisa simu ona paresér hosi ministériu públiku, tribunál rekursu, defensoria públika, enkuantu falta de’it hosi sentru formasaun judisiária Timor-Leste.
Depois ministériu simu hotu paresér hosi instituisaun sira, konsellu sei halo reuniaun ikus hodi hadi’a ezbosu ne’e no kontinua ho semináriu ida hodi konvida expert sira timoroan no estranjeiru ne’ebé iha kapasidade iha área refere hodi elabora di’ak liután antes entrega ba Konsellu Ministru hodi halo apresiasaun.
“Lei ida ne’e maka baze loloos ita atu komesa hakat ba reforma setór judisiáriu”, realsa.
Jornalista: Agapito dos Santos
Editora: Rita Almeida
