DILI, 16 dezembru 2019 ( TATOLI) – Ministra Edukasaun, Juventude no Desportu (MEJD) Dulce de Jesus dehan, Ministériu sei nafatin halo análiza ba progresu MEJD nian bazeia ba rezutadu ezame nasionál ne’ebé estudante sira hatudu maibé to’o agora Ministériu seidauk susesu tanba númeru dezempeñu estudante sira nian tuun liu tanba rezultadu husi ezame nasionál mak sai nu’udar instrumentu ida de’it ba MEJD hodi sukat dezempeñu estudante sira nian.
Dulce de Jesus Soares.Imajen/Antonio Goncalves
MEJD to’o agora la susesu tanba bazeia ba kestaun rua ne’ebé iha. “Ita-nia oan sira durante ne’e aprende fali buat ne’ebé la merese sira atu aprende tanba ne’e mak husi rezultadu ezame nasionál ne’e sira la hatudu rezultadu ida di´ak. Signifíka, dezempeñu estudante sira nian tuun liu,” dehan Ministra Dulce de Jesus iha ninia intervensaun ba diskusaun reforma kurríkulu ba Ensinu Báziku terseiru siku iha salaun INFORDEPE, Matadoru, segunda (16/12/2019).
Notísia relevante:Governu Halibur Ideia Revé Kurrikulu Ensiñu Sekundáriu Jerál no Tékniku Vokasionál
Nia dehan susesu MEJD nian la´ós hare husi buat ne’e mak ministra, diretór jerál no nasionál sira halo maibé susesu ne’e hare ba dezempeuo estudante sira nian Iha eskola. Kuandu kada tinan eskola sira gradua estudante finalista 50% menus husi materia ne’ebé presiza atu hatene, signifika MEJD la susesu. Tanba ne’e 2020 presiza atu hare didiak hodi nune’e revizaun ba kurríkulu ne’e bele lori progresu diak ba Ministériu.
“Intervensaun ida de’it mak atu reve kurríkulu maibé profesór sira la uza ho loloos, jestór eskola sira la uza ho loloos pontualidade, asiduidade organizasaun eskola, sala-de-aula, avaliassun ba estudante sira inklui ligasaun di´ak ho inan-aman sira, presiza koñesimentu profesór sira nian. Mesmu kurríkulu ho dokumentu sira furak sei laiha diferensa”.
Tan ne’e, governante ne´e husu ba diretór munisípiu no dirijente sira atu hatan ba sitasaun ida ne’e. “La´ós buka atu halo diak de’it ba aan rasik no oferese ideia sira ne’ebé iha baze sientífiku maibé oinsa bele servisu hamutuk halo esforsu ida hodi hadi´a kualidade edukasaun iha nasaun ne’e,” ministra fó hanoin.
Notísia relevante:Estudante ESG 4 Setembru UNAMET Na’in 16 Reprovadu
Jornalista : Tomé Amado
Editór : Rafy Belo
