Magnífiku Reitór UNPAZ, Adolmando Amaral. Imajen: Nelia Fernandes

Tempu to’o ona ba imi atu re-integra aan ba komunidade, hatudu imi-nia aan nu´udar ema matenek hodi bele lori rai ida ne’e ba moris di´ak. Terus no difikuldade ne’ebé pasadu sei motiva imi ba nafatin

DILI, 12 dezembru 2019 (TATOLI) –Universidade da Paz (UNPAZ) liuhusi Fakuldade Ekonomia (FK), ohin, fó judisium ba estudante finalista na´in 390. Judisiáriu sira ne´e kompostu husi Departamentu Jestaun, Bankária no Akuntabilidade.

Notísia relevante:Graduasaun UNPAZ Sei “Ala Eropa”

Magnífiku Reitór UNPAZ, Adolmando Amaral konsidera katak durante tinan haat kria hela problema iha família laran tanba ezije inan-aman sira tenke selu propinas eskola nia. Dala barak sempre mosu dezentendimentu iha família nia laran.

Inan-aman barak mak laran triste hanoin la hetan kuandu oan sira ejize demais. Ne’eduni husi problema tinan haat ne’ebé judisiáriu sira husik hela ba familia.

“Ohin momentu importante ba finalista sira atu buka rezolve problema sira ne’e. Ita bo´ot sira halo hela problemas ba familia sira maibé ohin ho judisium ne’e nu’udar pasu foun ida ba imi atu hakat ba oin hodi rezolve problema ne’ebé durante tinan haat imi husik hela ba sira,” dehan Reitór Adolmando Amaral ba judisiáriu na’in 390 iha salaun UNPAZ, ohin.

Nia haklaken, nu´udar estudante finalista ne’ebé sei simu títulu ka grau akadémiku lisensiatura iha loron 30 dezembru agora, sei integra aan fila fali ba komunidade nia leet.

Ida ne’e momentu ida atu hadi´a fila fali ekonomia familia nian hodi rezolve problemas iha tinan haat nia laran. Imi-nia títulu sira ne’e mak sei garante dezenvolvimentu ida sustentável ba família, sosiedade no komunidade. Imi haka’as aan ba atu kompete iha merkadu traballu hodi bele garante fila fali moris di´ak iha familia”.

Matan-been Monu

Bainhira hato´o hela lia menon, Reitór UNPAZ, Adolmando Amaral, neon susar no la biban tahan nia matan-been, hanoin hikas difikuldade hotu ne´ebé judisiáriu sira liu ona iha tempu difisil nia laran. Ho matan-been sulin, ho domin, Reitór Adolmando hateten:

“Tempu to’o ona ba imi atu re-integra aan ba komunidade, hatudu imi-nia aan nu´udar ema matenek hodi bele lori rai ida ne’e ba moris di´ak. Terus no difikuldade ne’ebé pasadu sei motiva imi ba nafatin”.

Iha biban hanesan, Dekanu FE, UNPAZ, Elídio de Araújo husu ba judisiáriu 390 atu defende sira-nia títulu akadémiku iha sosiedade hodi labele hamosu dúvida iha públiku nia leet. “Títulu la´ós nu´udar amostra de´it maibé nu´udar responsabilidade”.

Dekanu ne´e  haklaken, nu’udar ema ne’ebé moris iha akadémiku no iha koñesimentu kle´an kona ba edukasaun, buka atu eduka ema sai ema, tantu polítiku, ekonomíku no seluk tan tanba agora daudaun, iha nasaun ne’e,  moris ema nian variadade tanba ne’e presiza atu haka´as aan hodi sai ema ida ne’ebé hatene no matenek

“Ema ne’ebé riku kontinua riku no ida ne’ebé moris ki´ak kontinua hela nafatin iha kotuk ho ninia moris ne’ebé ki´ak. Ne’eduni atu halo moris ne’e la sai difisil presiza estuda hodi sai matenek”.

“Ho nune’e mak lisensiada no lisensidu Fakuldade Ekonomia husi Departamentu Jestaun, Bankária no Akuntabilidade tenke sai kualidade, matenek ne’ebé hetan iha akadémiku tenke fahe ba ema seluk atu nune’e keta lakon,” enkoraja Dekanu Elídio de Araújo.

Notísia relevante:UNPAZ Sei Gradua Estudante Finalista Na´in 1.589

Jornalista        : Tomé Amado

Editór              : Rafy Belo

1 KOMENTÁRIU

HAKEREK NO HATÁN

Please enter your comment!
Please enter your name here