Autoridade Servisu Alfandega halo hela pasa revista ba visitantes sira neebe tama sai iha Fronteira Motaain,Batugade. Imajen/Alex Santos

BOBONARO, 10 dezembru 2019 (TATOLI)-Servisu Aduaneira Postu Motain Munisípiu Bobonaro, dadaun ne’e infrenta hela problema atu halo pasa revista ba sasan importasaun no esportasaun  ho kuantidade boot tanba mákina Raiu-xís (X-ray sigla Inglés) ho kapasidade  boot ne’ebé monta iha fatin ne’ebá avaria ona besik tinan ida.

Diretór Autoridade Aduaneira Munisípiu Bobonaro, Alberto Seixas, informa postu integradu Motain iha mákina X-ray hamutuk tolu, mákina rua ba vagajen kiik, no mákina boot ida seluk avaria ona.

Notísia Relevante: Mákina X-Ray Iha Sala VIP Aeroportu Bele Utiliza Ona

“Mákina ida boot ne’e aat ona,”relata, Alberto Seixas, ba TATOLI, iha Motaain, Postu Administrativu Balibo Munisípiu Bobonaro, segunda horiseik.

Alberto Seixas, hatete mákina ne’e aat ona antes nia destaka servisu  ba Postu Integradu Motain iha fulan-agostu 2019 liubá.

Notísia Relevante:Governu Hakarak Moderniza Ekipamentu Sira iha Fronteira

Nia parte informa ona problema ne’e ba Diresaun Alfándega Nasionál no Ministériu Financas hodi buka solusaun liliu atu halo manutensaun ba ekipamentu estadu ne’e.

Tuir Nia mákina X-ray importante atu tulun pesoál sira hodi hala’o servisu liliu atu deteta ai-moruk droga, kilat musan no sasan seluk tan ne’ebé proibiu tama Timor-Leste tanba dadaun ne’e uja de’it sistema manuál susar atu deteta.

 “Mákina x-ray maka bele deteta ema subar kilat musan, osan mean no ai-moruk droga, maibé mákina la funsiona susar atu deteta,”Nia esplika tan.

Notísia Relevante:Presiza Investe Ba Fasilidade Alfándega Hodi Apoia Servisu

Problema ne’e mós afeita ba servisu pesoál sira nian atu prosesu dokumentu no sasan sira ho lalais.

Entretantu, Autoridade Aduaneira Postu Motain iha pesoál hamutuk na’in 24 maka destaka iha área IT, administrasaun, financas no seluk tan.

Jornalista:Agapito dos Santos

Editór   :Francisco Simões

HAKEREK NO HATÁN

Please enter your comment!
Please enter your name here