Ministra Finansa ein ezersísiu, Sara Lobo Brites, hamutuk ho Diretór Jerál Ministeriu Finansa, hala’o audiensia ho Komisaun C, D no E kona-ba OJE 2020. Imajen/TATOLI Egas Cristovao.

DILI, 05 novembru 2019 (TATOLI) – Governu liuhusi Ministériu Finansa (MF) aloka orsamentu millaun $8 hodi moderniza ekipamentu sira iha fronteira, konstrusaun edifísiu ba postu sira no mellora sistema data center inklui sosa ekipamentu balun iha 2020.

“Ami hakarak moderniza ekipamentu iha Batugadé no Salele iha tinan 2020, sei sosa x-ray ba hand carry ida tau iha Batugadé ho nia montante millaun $1,5, x-ray body scanner ida tau mós iha Batugadé ho nia montante rihun $100, atu hola mós jembatan timbang ou cargo scanner atu karreta hotu-hotu tama iha ne’ebá tetu tiha mak kalkula ninian kustu ba taxa ninian ne’e ho montante rihun $250”, Diretór Jerál Servisu Korporativu MF, Joanico Pinto,  bainhira hala’o audiénsia ho komisaun C, D E no F kona-ba Orsamentu Jerál Estadu (OJE) 2020 iha plenária Parlamentu Nasionál, segunda ne’e.

Joanico dehan sosa ekipamentu hirak ne’e ho montante boot iha Batugadé atu deteta husi leten no sorin, tanba daudaun iha raiu-xís ho Smiths Detection HI-Scan ho manuál ne’ebé kada tinan kustu manutensaun boot liu, mas ladún fó benefísiu mai Estadu.

“Ita-nia pesoál sira ne’ebé halo revista iha fronteira sira sei ho manuál ne’ebé iha risku barak ne’ebé ita mós atu hola portable detection unidade 20 para sira hotu utiliza iha área Batugadé no fronteira sira”, nia informa.

Liuhosi orsamentu millaun $8 ne’e, nia dehan ba kapitál menór sei uza rihun $150 atu sosa CCTV ka kámara video vijilánsia ida atu monta iha torre Ai-tarak Laran no rihun $100 atu sosa mós CCTV indoor hodi monta iha Batugadé.

“CCTV iha torre Ai-tarak Laran daudaun ne’e ami iha hela ho analog ne’ebé ami hakarak dijitaliza tiha no CCTV indoor iha Batugadé ho kapasidade deteta metru 50 ba tasi tanba tuir informasaun katak poténsia ilegál sira ne’e liuhusi área tasi nian”, Joanico afirma.

Nia salienta, aloka mós millaun $2,2 ba iha disaster recovery center, hafoin Governu harii tiha data center ida iha torre Ai-tarak Laran, maibé ida rekomendasaun barak husi tékniku sira tenke iha back up atu situasaun ruma akontese data importante labele lakon.

“Ami mós aloka rihun $212 ba hola komputadór ida ho kualidade atu ita monitoring ba data servidór hotu atu ema labele halakon data importante tuir nia hakarak”, katak.

Iha mós alokasaun orsamentu rihun $40 atu sosa motorizada unidade 15 hodi responde ba pesoál estatístika iha munisípiu sira tanba daudaun ne’e sira uza transporte privadu no sosa mákina impresora unidade balun iha Dili no munisípiu sira.

Entretantu, alokasaun iha Kapitál Dezenvolvimentu iha OJE 2020 rihun $899 sei foka liu ba nesesidade iha fronteira ne’ebé laiha kondisaun servisu, presiza dormitóriu ida atu toba, halo dormitóriu iha Batugadé no Salele no instalasaun bee-moos, hola ekipamentu hadi’a postu Alfándega sira iha fronteira liuliu iha Maliana no seluk tan.

Antes ne’e, Diretór Jerál ein Ezersísiu Autoridade Aduaneira (AA/Alfándega), Julião J. Fernandes, hatete presiza duni Governu liuhosi Ministériu Finansa (MF) fó prioridade ba konstrusaun edifísiu no sosa ekipamentu hodi fasilita servisu alfándega iha fronteira Nunura-Tunubibi, Postu Administrativu Maliana, Munisípiu Bobonaru.

Julião J. Fernandes friza Alfándega aprezenta ona planu no dezeñu, maibé MF sei avalia hodi deside prioridade atu aloka orsamentu.

Notísia relevante : Alfándega Aprezenta ona Planu Konstrusaun Edifísiu Tunubibi ba MF

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here