Jornalista GMN nain tolu ne'ebé GMN hapara sira nia servisu. Imajen/Domingos Piedade

DILI, 03 dezembru 2019 (TATOLI) –Sekretaria Estadu Formasaun Profisionál no Empregu (SEFOPE) liuhosi Diresaun Nasional Relasaun ba Traballu (DNRT), Departamentu Mediasaun no Konsiliasaun, segunda (02/12/2019), tuku 14:00 Otl, haruka ona karta notifikasaun ba Diretór Informasaun Grupo Media Nacional (GMN), Fransedes Suni, atu bele marka prezensa iha SEFOPE hodi submete ba primeiru mediasaun ba kazu hasai jornalista nain tolu hosi servisu.

Notísia Relevante : Jornalista Nain Tolu Keixa GMN Ba SEFOPE

Karta notifikasaun ne’ebé SEFOPE haruka ba Julito Ximenes ho Fransedes Suni, diretór informasaun GMN atu submete ba primeira mediasaun iha SEFOPE.

Iha loron 31 outubru 2019, GMN liuhosi Diretór Rekursu Umanu, Nivio Freitas ho koñesimentu hosi Diretór Informasaun GMN, Fransedes Suni, hasai karta ba jornalista nain tolu; Julito Ximenes, Evaristo Mariz ho Carmelita Isaac, hodi hapara sira nia servisu iha loron determinadu, 30 novembru 2019. Ho nune’e, jornalista nain tolu halo hikas karta auto defeza hodi husu justifikasaun loloos ho aprezenta dezempeñu servisu. Infelizmente, karta auto defeza ne’ebé jornalista nain tolu hatama iha loron 06 novembru 2019 la hetan resposta.

Notifikasaun hanesan mós SEFOPE dirije ba jornalista nain tolu; Julito Ximenes, Evaristo Mariz ho Carmelita Isaac, atu marka prezensa iha SEFOPE iha loron 10 dezembru 2019, tuku 14:30 Otl, hodi hola parte iha mediasaun entre parte sira ne’ebé fasilita hosi SEFOPE iha sala mediasaun SEFOPE, Caicoli, Dili.

“Ami   nain tolu simu ona notifikasaun no kolega Carmelita Isaac mós lori ona notifikasaun SEFOPE nian ne’e ba entrega iha GMN ne’ebé dirije ba Fransedes Suni atu bele hola parte iha mediasaun ba ami nia kazu,” informa Julito Ximenes, hodi responde Ajénsia TATOLI, ohin, iha Dili.

Iha karta  hapara sira jornalista nain tolu ne’e ho razaun la hanesan. Ba Jornalista Julito Ximenes nia kauza tanba hala’o dupla funsaun, maibé Julito rasik halo ona karta auto defeza hodi  husu evidénsia ka prova, maibé GMN la responde karta no nunka hatudu prova ruma.

Ba jornalista Carmelita Isaac, GMN deside hasai nia hosi servisu tuir karta ne’ebé asina hosi Nivio Freitas nu’udar Diretór Rekursu Umanu  GMN ho Fransedes Suni, nu’udar Diretór Informasaun GMN, katak dezobediénsia ba ierarkia. Nune’e, Carmelita mós halo ona karta auto defeza hodi husu justifikasaun  no avaliasaun dezempeñu. Maske nune’e, to’o ohin loron, GMN nunka halo resposta no nunka   aprezenta sala sira ne’ebé mak GMN sita hodi sai hanesan razaun ba GMN hasai Carmelita  hosi servisu.

Ba jornalista Evaristo Mariz, GMN hola desizaun hasai nia hosi servisu tanba razaun ne’ebé GMN aprezenta iha karta ho N/Ref 03/Adm.DAFRH-GMNTV/X/19, katak komete violasaun repetitivu hasoru regra jornalizmu nian. Nune’e, Everisto Mariz  mós uza nia auto defeza hodi resposta ba karta ne’e hodi husu aprezenta faktu ba sala sira ne’ebé GMN mensiona. Maibé, to’o ohin loron GMN nunka halo resposta ba nia karta hodi aprezenta evidénsia no prova ruma.

Jornalista Ajénsia TATOLI halo ona esforsu atu halo entrevista direita ho Diretór Informasaun GMN, Fransedes Suni, maibé la konsege hasoru Fransedes Suni iha Edifísiu GMN ho razaun katak nia lakohi halo komentáriu.

Jornalista : Domingos Piedade Freitas

Editór       : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here