BALI, 04 dezembru 2019 (TATOLI)—Primeira asembleia jerál rede Konsellu Imprensa Sudeste Aziátiku (SEAPC-Net, sigla inglés) iha Nusa Dua, Bali, ohin, hili Muhammad NUH ba prezidente SEAPC-Net ba primeiru periodu tinan rua (2019-2021).
Notísia Relevante : Nasaun Haat Konkorda Estabelese Rede KI Sudeste Aziátiku
Muhammad NUH atuál prezidente Konsellu Imprensa Indonézia (DPI-sigla indonézia) hetan fiar ne’e hosi primeiru asembleia jerál SEAPC-Net ho nia Vise U Ohn Kyaing nu’udar Prezidente Konsellu Imprensa Myanmar no Sekretáriu Jerál mak Asep Setiawan nu’udar membru Konsellu Imprensa Indonézia.
Primeira asembleia jerál SEAPC-Net ne’ebé hala’o iha otél Santika, Nusa Dua, Bali, Indonézia, hili mós diretór board nain haat (4), kompostu hosi Agus Sudibyo, membru Konsellu Imprensa Indonézia, Kyaw Swa Min, membru Konsellu Imprensa Myanmar, Chavarong Limpattamapannee, prezidente Konsellu Imprensa Tailándia ho Virgilio da Silva Guterres, prezidente Konsellu Imprensa Timor-Leste (CI-TL, sigla portugés).
Notísia Relevante : Prezidente PN Tailándia Apresia no Apoiu Rede KI Sudeste Aziátiku
Primeira asembleia SEAPC-Net ne’e partisipa hosi membru no fundadór SEAPC-Net, ne’ebé kompostu hosi konsellu imprensa hosi nasaun haat, mak hanesan Konsellu Imprensa Indonézia, Konsellu Imprensa Myanmar, Konsellu Imprensa Tailándia ho Konsellu Imprensa Timor-Leste.
Liuhosi asembleia jerál ne’e deside mós atu hala’o primeiru reuniaun Diretór Board SEAPC-Net nian sei hala’o iha Dili iha loron 09 to’o loron 10 fulan maiu 2020, perante sesaun reuniaun Forum Diálogu Dili (DDF-sigla ingles).
Iha asembleia jerál ne’e aprova mós Konstituisaun SEAPC-Net nian nu’udar mandatóriu SEAPC-Net nian ho nia alvu servisu mak promove liberdade imprensa no liberdade espresaun iha rejiaun Sudeste Aziátiku. Inklui, halo advokasia no kapasitasaun, liuhosi atividade workshop, formasaun ba mídia ho jornalista sira.
Jornalista : Francisco Simões
Editór : Xisto Freitas
