Delegasan CI Timor-Leste foto hamutuk ho Prezidente PN Tailándia, Chuan Leekpai iha PN iha Bangkok, kuarta (25/09/2019). Imajen/KI Tailándia

BANGKOK, 26 setembru 2019 (TATOLI)—Prezidente Parlamentu Nasionál Tailándia, Chuan Leekpai, apresia no fó apoiu totalmente ba inisiativa estabelesimentu rede Konsellu Imprensa Sudeste Aziátiku.

Notísia Relevante : Nasaun Haat Konkorda Estabelese Rede KI Sudeste Aziátik

Prezidente CI TL, Virgílio da Silva Guterres, simu livru husi Prezidente PN Tailándia, Chuan Leekpai. Imajen/Francisco Simões

Liuhusi enkontru kordiál   membru sira Konsellu Imprensa (KI) husi Tailándia, Myanmar, Indonézia no Timor-Leste ho Prezidente Parlamentu Tailándia, Chuan Leekpai, iha Parlamentu Nasional iha Bangkok, kuarta (25/09/2019),  Prezidente KI Tailándia nian, Chavarong Limpattamapanee, fó koñesimentu ba Prezidente PN Tailándia kona-ba inisiativa ne’e. Ho nune’e,  Chuan Leekpai, afirma nia gratidaun no apresiasaun profunda tebes hodi apoiu rede KI Sudeste Aziátiku ne’e atu bele fó kontribuisaun ba promove liberdade imprensa iha rejiaun ne’e.

Nia hateten, prinsípiu liberdade imprensa hanesan demokrasia nia ‘is’, tanba ne’e, nia agradese tebes ba Konsellu Imprensa husi Myanmar (PCM-sigla Inglés), Konsellu Imprensa Indonézia (DPI-sigla Indonézia), Konsellu Imprensa Nasionál Tailándia (NPCT-sigla Inglés) ho Konsellu Imprensa (CI-sigla Portugés) Timor-Leste, ne’ebé hola ona inisiativa di’ak ba estabelesimentu rede ne’e atu bele iha komunikasaun di’ak entre konsellu imprensa sira iha rejiaun ne’e hodi serbisu hamutuk ba dezenvolvimentu no liberdade imprensa.

“Rede Konsellu Imprensa Sudeste Aziátiku ne’e   importante no nesesáriu atu ita serbisu hamutuk ba interese promove liberdade imprensa,”  hateten Prezidente PN Tailándia, Chuan Leekpai nu’udar mós eis Primeiru-Ministru Tailándia nian.

Liu husi soru-mutu istóriku ne’e, Konsellu Imprensa husi rai ida-idak nian mós hato’o sira nia profunda gratidaun ba Prezidente PN, Chuan Leekpai, nu’udar mós eis Ministru Defeza Tailándia nian, tanba koloka ona tempu hodi bele simu delegasaun konsellu imprensa hodi partilla hanoin balun kona-ba estabelesimentu rede Konsellu Imprensa Sudeste Aziátiku.

Iha oportunidade ne’e, Prezidente PN , Chuan Leekpai mós ‘nostaljia’ uitoan ho delegasaun Konsellu Imprensa  (CI-sigla portugés) Timor-Leste ne’ebé lidera husi Prezidente CI, Virgílio da Silva Guterres, kona-ba nia desizaun iha tinan 1999 hanesan Primeiru Ministru  Tailándia nian (1997-2001) hodi haruka Forsa Defeza Tailándia nian ba Timor-Leste hodi envolve iha misaun INTERFET.

Oportunidade ne’e, Virgílio Guterres, hato’o mós profunda agradesimentu ba apoiu hotu ne’ebé Estadu no povu Tailándia halo ba povu Timor-Leste dezde situasaun difisil to’o ohin loron.

Virgílio Guterres rekoñese hodi lia tuun dehan, povu Tailándia nia apoiu kontinua sia hanesan esperansa ba povu Timor-Leste, liu-liu iha tempu ukun rasik aan ida ne’e, oinsá povu ho Estadu Tailándia kontinua apoiu Timor-Leste kona-ba Timor-Leste nia adezaun ba Asian.

Virgílio mós informa ba Prezidente PN, Chuan Leekpai, kona-ba apoiu diretamente Prinseza Tailándia, Ubolratana (oan feto husi Liurai Tailándia)  iha Timor-Leste.

Haree ba kontribuisaun  Chuan Leekpai nu’udar eis Primeiru  Ministru periode dala rua: 1992-1997 ho 1997-2001, ne’ebé hola desizaun hodi haruka forsa Armada Tailándia nian ba  Timor-Leste iha misaun INTERFET, Virgílio Guterres, konvida ho onra ba   Chuan Leekpai atu bele vizita mós Timor-Leste.

Asina Deklarasaun Bangkok

Rede Konsellu Imprensa Sudeste Aziátiku foto hamutuk ho Prezidente PN Tailándia, Chuan Leekpai, kuarta (25/09/2019). Imajen/KI Tailándia

Konsellu Imprensa husi nasaun haat (4) ne’ebé hasoru malu iha Bangkok durante loron rua nia laran, hahú husi Tersa-Kuarta (24-25/09/2019), konsege hamosu no asina deklarasaun Bangkok ho nia kompromisu atu estabelese rede KI Sudeste Aziátiku ho naran South-east Asian Press Council  Network (SAPCN).

Deklarasaun ne’e   asina entre parte sira iha News Museum THAIRATH,  ho nia objetivu prinsipál, “hamosu kooperasaun atu hametin liberdade imprensa no nia papél iha demokrasia” .

Iha enkontru ne’e estabelese mós ekipa traballu ne’ebé kompostu husi reprezentante sira husi KI nasaun haat nian atu hakerek termu rede nian ne’ebé sei formaliza iha Simeira Bali Demokrasi Forum  iha Dezembru 2019.

Deklarasaun ne’e hanesan istória boot ida tanba foin ba dala uluk  estabelese rede  ida iha ámbitu komunikasaun sosiál, liu  husi instituisaun Konsellu Imprensa sira iha rejiaun ne’e.

Jornalista : Francisco Simões

Editór     : Xisto Freitas 

HAKEREK NO HATÁN

Please enter your comment!
Please enter your name here