Konsellu Imprensa husi nasaun haat konkorda estabelese rede Konsellu Imprensa Sudeste Aziátiku liu husi soru-mutuk ne'ebé halao iha Konsellu Imprensa Tailándia, Bangkok, tersa (24/09/2019). Imajen/Mídia NPCT

BANGKOK, 25 setembru 2019 (TATOLI)—Konsellu Imprensa (KI) husi nasaun haat, kompostu husi Konsellu Imprensa Indonézia ((DPI-sigla Indonézia),  Konsellu Imprensa Myanmar  (MPC-sigla Inglés), Konsellu Imprensa (CI-sigla Portugés) Timor-Leste ho Konsellu Imprensa Nasionál Tailándia (NPCT-sigla Inglés) konkorda malu ona hodi estabelese rede konsellu imprensa Sudeste Aziátiku.

Notísia Relevante : CI ho Thai PBS Asina MoU iha Área Esensiál Tolu

Membru CI Timor-Leste, Paulo da Cruz de Araújo, simu prenda husi Fakuldade Komunikasaun no Arte , Universidade Chulalaongkorn, Bangkok, tersa (24/09/2019). Imajen/Francisco Simões

Konkordánsia istóriku ne’e afirma liu husi soru-mutu entre parte sira ne’ebé hala’o iha Salaun konferénsia NPCT iha Bangkok, Tailándia, tersa loraik (24/09/2019),  ho intensaun prinsipál hamosu forum internasionál atu hametin komunikasaun no kooperasaun hodi promove liberdade imprensa iha rejiaun ne’e.

Notísia Relevante : Thai PBS ho CI Buka Meiu Kombate Hoax no Diskursu Ódiu

Maske parte sira konkorda ona,  maibé seidauk bele ofisializa konkordánsia nee, tanba  presiza halo diskusaun tékniku kle’an liu tan. Ho nune’e, parte sira deside ona harii ekipa task force ne’ebé kompostu husi membru konsellu imprensa sira husi nasaun haat nee atu diskute no halo preparasaun ba ninia konteúdu akordu serbisu hamutuk ne’e.

Sorumutk iha Konsellu Imprensa Tailándia, Bangkok, tersa (24/09/2019). Imajen/Francisco Simões

Ekipa task force ne’e kompostu husi membru KI nain haat, mak hanesan  Paulo da Cruz de Araújo, nu’udar membru CI Timor-Leste, Agung Dharmajaya membru DPI, Myint Kyaw, membru MPC ho Chalermchai Yodmalai nu’udar membru NPCT.

Serbisu esensiál ne’ebé ekipa task force ne’e presiza finaliza mak konteudu akordu estabelesimentu rede konsellu imprensa ne’e nian molok lori ba ofisializa iha simeira Bali Demokrasi Forum, ne’ebé sei hala’o iha Bali, Indonézia, iha Outubru, tinan ne’e.

Liu husi soru-mutu ne’e, Konsellu Imprensa husi nasaun ida-idak, hanesan Tailándia, Indonézia, Myanmar ho Timor-Leste, introdús situasaun,  dezafiu no dezenvolvimentu mídia iha ida-idak nia rain no rekomendasaun sira balun ne’ebé aprezenta husi parte sira atu buka meiu apoiu malu hodi hamutuk enfrenta dezafiu ohin loron nian.

Iha ámbitu ne’e prezidente CI, Virgílio da Silva Guterres, mós aprezenta situasaun balun kona-ba dezenvolvimentu mídia iha Timor-Leste, liu-liu kona-ba saida mak CI Timor-Leste presiza halo atu kontinua sai hanesan “guardiaun” ba promove liberdade imprensa iha Timor-Leste.

“Sé ita haree ba index liberdade imprensa iha Sudeste Aziátiku,  ami ho orgullu hateten, ami nia index liberdade imprensa di’ak liu liberdade imprensa iha nasaun sira Sudeste Aziátiku ne’e. tanba ne’e, ami kontinua serbisu atu mantein ho kuidadu tebes liberdade ida ne’e no ami CI Timor-Leste  iha situasaun ne’e, ami sei prodús auto regulasaun kona-ba independénsia editoriál,” hateten Virgílio da Silva Guterres.

Buat seluk mak, Virgílio hateten, CI Timor-Leste sei buka suporta asosiasaun jornalista sira atu oinsá konsentra iha kapasitasaun ba nia membru  jornalista sira atu hasae sira nia koñesimentu no abilidade liu husi formasaun, seminar, workshop no atividade produtivu sira seluk tan.

Soru-mutu nee nu’udar oportunidade di’ak atu konsellu imprensa sira iha Sudeste Aziátiku ne’e bele  aprofunda komunikasaun no serbisu hamutuk hodi promove liberdade imprensa ida rejiaun.

“Ami ohin sai hosting ba enkontru ida ne’e hanesan oportunidade di’ak lori esperansa di’ak ba ita hotu no ba ita nia interese atu asegura promove liberdade imprensa iha ita nia rejiaun,” hateten Prezidente Konsellu Imprensa Tailándia (NPCT), Chavarong Limpattamapanee.

Chavarong hateten,  soru-mutu  ne’e atu bele  fahe ideia ba malu kona-ba oinsá mak konsellu imprensa sira iha rejiaun ida ne’e bele serbisu hamutuk ba interese dezenvolvimentu mídia nian no promove liberdade imprensa.

Liu husi diskusaun no fahe informasaun ba malu, membru DPI Agus Sudibyo ho Ahmad Djauhar, aprezenta planu no programa serbisu DPI nian ne’ebé iha relasaun ho formula

Regulasaun kona-ba mata dalan ba reportajen ho mós kooperasaun ne’ebé estabelese ona entre DPI ho forsa armada Indonézia (TNI-sigla Indonézia) atu oinsá mak hamutuk tau konsiderasaun  serbisu jornalizmu nian.

Ahmad Djauhar mós informa kona-ba medida  balun ne’ebé DPI foti ona relasiona ho situasaun liberdade imprensa iha Papua. Nia hatutan,  DPI ho asosiasaun jornalista sira Indonézia nian hanesan Aliansi Journalist Independent (AJI) ho IJTI (Ikatan Journalist Televisi Indonesia) ba ona Papua hodi halo investigasaun ba situasaun sira ne’e atu bele iha nia klaridade no espera tempu badak DPI sei hasai nia pozisaun.

“Antes ne’e liberdade imprensa iha Indonézia di’ak hela,  maibé agora problema uitoan.  Liu husi suru-mutuk ne’e mak ita bele iha kometimentu atu oinsá mak ita bele haree hamutuk no halo advokasia ba dezafiu no tentasaun sira hasoru liberdade imprensa,” hateten Ahmad Djauhar.

Antes soru-mutu ne’e, delegasaun konsellu imprensa husi nasaun haat ne’e, halo vizita ba Fakuldade Komunikasaun ho Arte, Universidade Chulalongkorn, Bangkok, Tailándia, hodi esplora saida de’it kona-ba fakuldade komunikasaun no arte iha universidade refere, inklui haree  fasilidade sira ne’ebé iha relasaun ho departamentu jornalizmu nian.

Jornalista       : Francisco Simões

Editór             : Xisto Freitas           

HAKEREK NO HATÁN

Please enter your comment!
Please enter your name here