Diretór DNAS,  Mateus da Silva. Imajen/Nelson de Souza

DILI, 02 dezembru 2019 (TATOLI)-Ministériu Solidariedade Sosiál no Inkluzaun (MSSI) liuhosi Diresaun Nasionál Protesaun Ema ho Defisiénsia, kontinua halo konsulta ho autoridade munisípiu, liña ministériu no organizasaun sosiedade sivíl kona-ba polítika nasionál inkluzaun ba ema ho defisiénsia ba periodu 2020-2024.

Notísia Relevante : MSSI ho MS Halo Konsultasaun Nível Ministeriál Ezbosu PAN Ba Ema Ho Defisiénsia

Diretór Nasionál Protesaun Ema ho Defisiénsia MSSI, Mateus da Silva, hatete, nia parte remata ona konsultasaun iha Munisípiu Ermera, Liquiça, Bobonaro, Aileu, Ainaro, Covalima, Manufahi, no tuir planu sei hala’o iha Munisípiu Baucau iha loron 05 dezembru depois kontinua ba munisípiu sira seluk, inklui Rejiaun Administrativu Espesiál Oe-cúse Ambeno (RAEOA).

“Hosi rezultadu konsultasaun ne’e, ami sei elabora planu hodi aprezenta ba Konsellu Ministru. Nune’e, bainhira aprova ona bele sai hanesan baze hodi implementa iha ministériu ida-idak,” hateten  Mateus da Silva, ohin, ba Ajénsia TATOLI iha ninia servisu fatin, Caicoli, Dili.

Notísia Relevante : ADTL Husu MSSI Aprezenta Dekretu Lei Kona-ba Defisiénsia Ba Konsellu-Ministru

Antes ne’e MSSI halo ona konsultasaun hanesan ho Ministériu Justisa, Ministériu Edukasaun Juventude no Desportu, Ministériu Saúde, Ministériu Obras Públikas, Sekretáriu Estadu Igualdade no Inkluzaun no seluk tan iha nivel nasionál.

Notísia Relevante : ADTL Husu Estadu TL Ratifika Konvensaun Ba Ema Ho Defisiénsia

Polítika nasionál ba ema ho defisiénsia ne’e importante ba Governu atu fó asisténsia no protesaun ba ema ho defisiénsia hodi asesu iha área Saúde, Edukasaun, Justisa, Transporte Públiku, Formasaun Professional no Empregu, Desportu no seluk tan.

“Polítika governu ba ema defisiénsia ne’e atu labele husik ema ida iha kotuk hodi partisipa másimu iha prosesu dezenvolvimentu hanesan mós ho sidadaun sira seluk,” nia tenik.

Notísia Relevante : Brazíl Apresia Polítika TL ba Ema ho Defisiénsia

Tuir dadus estatístika sensu uma-kain 2015 rejista ema defisiénsia fíziku, matan, tilun, monok, moras mental no seluk tan hamutuk 38.118.

Jornalista : Nelson de Sousa

 Editór      : Francisco Simões

HAKEREK NO HATÁN

Please enter your comment!
Please enter your name here