Sekretária Nasionál Direitu ba Ema Defisiénsia Brazil, Ana Paula Nedavaska, konversa ho Ministra Solidariedade Sosiál no Inkluzaun, Armanda Berta dos Santos. Imajen/Florencio Miranda Ximenes.

DILI, 18 novembru 2019 (TATOLI) – Brazíl apresia polítika Timor-Leste (TL) ne’ebé kria lejizlasaun sira hodi garante direitu ema ho defisiénsia atu laiha diskriminasaun entre sidadaun sira.

“Ha’u kontente tanba haree Governu Timor-Leste kria ekipa interministeriál liuliu koopera ho sosiedade sivíl no sidadaun hotu atu asegura direitu ema ho defisiente”, Sekretária Nasionál Direitu ba Ema ho Defisiénsia husi Brazíl, Ana Paula Nedavaska, hafoin enkontru ho Ministra Solidariedade Sosiál no Inkluzaun (MSSI), Armanda Berta dos Santos, iha Kaikoli, ohin.

Ana Paula friza presiza duni país sira ne’ebé ko’alia lian Portugés (CPLP, sigla Portugés) kontinua ajuda malu atu garante no asegura direitu ema ho defisiénsia iha asesu ba setór edukasaun, saúde no infrastrutura atu labele sente diskriminadu.

Nune’e, nia dehan, Brazíl mós hakarak koopera ho Governu hodi fó kapasitasaun ba ema ho defisiénsia atubele iha kriativadade iha setór oin-oin.

“Timor-Leste mós fó esperiénsia di’ak atu kria lejizlasaun hodi asegura direitu ema ho defisiénsia hodi laiha diskriminasaun entre ema normál ho ema ho defisiente”, katak.

Kooperasaun Brazíl ho Timor-Leste hahú iha 2012, liuliu kontinua fó informasaun ba malu hodi kapasita no asegura direitu ema ho defisiénsia sira iha setór hotu-hotu.

Sekretária Nasionál Direitu ba Ema ho Defisiénsia hosi Brazil ne’e mós husu nasaun CPLP hotu atu kontinua ajuda malu hodi garante nia sidadaun ne’ebé moris ho defisiénsia nia laran hodi sai hanesan sidadaun sira seluk.

Ministra Solidariedade Sosiál no Inkluzaun (MSSI), Armanda Berta dos Santos, dehan liuhusi vizita ne’e, MSSI informa katak Timor-Leste kontinua esforsu aan atu garante direitu ba ema ho defisiénsia.

“Ita informa ba sira katak kontinua esforsu atu garante ema ho defisiente nia direitu no partilla informasaun esperiénsia Timor-Leste nia tratamentu ema ho defisiente”, katak

Ministra Armanda Berta aprezenta katak Governu Timor-Leste liuhusi MSSI, la’ós serbisu mesak, maibé ho ministériu tomak atu haree ema ho defisiénsia.

“Ita haree ema ho defisiente importante tanba ne’e ami tau-matan hela, ami mós informa katak tinan 2020, ami sei kria Konsellu Nasionál ba Ema ho defisiénsia atu garante direitu tomak iha setór hotu iha dezenvolvimentu nasionál”, afirma.

Atu garante direitu ba ema ho defisiénsia, MSSI esforsu hela ho liña ministeriál atu tau-matan hotu ba ema sira ne’e iha setór edukasaun, saúde no infraestrutura. Nune’e iha OJE 2020 MSSI prevee orsamentu millaun $2.

Vizita Sekretária Nasionál Direitu ba Ema Defisiénsia, Ana Paula Nedavaska, hasoru malu ho Ministra solidariedade Sosiál no Inkluzaun, Armanda Berta dos Santos, ne’e akompaña husi Embaixadór Brazíl ba Timor-Leste, Aldemo Garcia.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here