DILI, 22 agostu 2019 (TATOLI)-Ministériu solidariedade Sosiál Inkluzaun (MSSI) no Ministériu Saúde (MS) hala’o workshop kona-ba Konsultasaun Nivel Ministeriál, Ezbosu Planu Asaun Nasionál (PAN) ba ema ho defisiénsia ba periodu 2020 to’o 2024 hodi asegura programa no orsamentu ne’ebé inkluziva ba asuntu defisiénsia no atinje Objetivu Dezenvolvimentu Sustentavel (ODS), la husik ema ida iha kotuk.

Diretór Jerál MSSI, Rui Manuel Exposto konsidera Planu Asaun Nasionál ema ho defisiénsia, tinan lima mai oin, la’o ho másimu tebes.

“Bazeia ba asuntu ne’e, Ministériu Solidariedade Sosiál no Inkluzaun hamutuk ho parseiru dezenvolvimentu sira, presiza ita konvida liña ministeriál sira hotu ne’ebé mak iha ligasaun no ita tuur hamutuk hodi haree tau Importánsia asuntu defisiente ninian,” hateten Diretór Rui Manuel Exposto, liuhusi diskursu, iha INS (Institutu Nasionál Saúde), Comoro, ohin.

Iha biban hanesan, Diretór jerál MSSI ne’e hateten katak sente orgullu ho MS tanba konsidera, semana rua liubá, MS serbisu hamutuk ho Sentru Nasionál Reabilitasaun halo sensibilizasaun iha Postu Administrativu Hatulia, Munisípiu Ermera “Ida ne’e hanesan pontu importante ba asuntu ema ho defisiénsia”.

Iha fatin hanesan, Diretór Nasionál Kontrola Moras, MS,  António da Costa hateten, Polítika Governu liuhusi  MS nia planu importante ba asuntu ida ne’e.

“Ministeriu Saúde nia papel hakerek iha ita-nia konstituisaun katak ema hothotu iha direitu atu asesu ba fasilidade saúde no gratuitu inklui ita-nia defisiente sira,” nia dehan.

Artigu ida ne’ebé mak ko’alia kona-ba saúde iha Konstituisaun Repúblika Demokrátika Timor-Leste (RDTL) mak artigu 57, liuliu alínea 1 no 2.

“Papel ida ne’e sai hanesan responsabilidade boot dezde ita-nia estadu hamriik tanba ne’e mak hodi kontinuasaun. Maibé, Ministériu Saúde la mesak atu halo servisu sira ne’e. Parseiru mak papél ministériu relevante sira liuliu MSSI,  importante. Tanba ne’e mak ministériu rua ne’e sai mós advokasia nafatin parte relevante sira seluk,” nia hateten.

Entretantu, partisipa iha konsultasaun PAA ba ema ho defisiénsia ba periodu 2020 to’o 2024  ne’e mak reprezentante husi Embaixada Austrália, Prezidente Konsellu Asosiasaun Defisiénsia Timor-Leste.

Inklui, asesór prinsipál Organizasaun Mundiál Saúde (OMS), dr. Rui Maria de Araújo no mós Asosiasaun Defisiénsia Timor Leste (ADTL).

Notísia relevante: http://www.tatoli.tl/2019/03/20/adtl-husu-mssi-aprezenta-dekretu-lei-kona-ba-defisiensia-ba-konsellu-ministru/

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here