Adjuntu Diretór Eskola Ensinu Sekundária Jerál Paulo VI, Atanasio António da Silva. Imajen: Nelia Fernandes

DILI, 21 novembru 2019 (TATOLI)—Adjuntu Diretór Eskola Ensinu Sekundária Jerál Paulo VI, Atanasio António da Silva, konsidera durante 2000 to’o ohin loron edukasaun Timor-Leste sei fraku tanba minsitériu kompetente sei duun malu katak iha baze la forte no iha baze atu halo saída se kondisaun infraestrutura no fasilidade eskola hanesan livru menus no kurrikulu eskolár laduun favorese.

Notísia relevante:ESG Paulo VI Hetan Instalasaun Wifi Gratuitu Husi TT

“Ezemplu, hanesan livru la iha. Profesór ida hakarak atu hanorin, nia tenke iha referénsia barak. Labele uza livru ida de’it. Parte balun, ita-nia kurrikulu tanba iha 2000 to’o agora, ita-nia kurrikulu mak ida-ne’e de’it. Kurrikulu ne’ebé ita uza ne’e adaptasaun husi Portugal. Maibé, ita kompara ho kurrikulu iha Indonézia ho ita-nia kurrikulu ne’e iha diferensa boot. Labarik sira akaba eskola atu ba universidade iha Indonézia susar uitoan. Ita tenke presiza haree ida ne’e,” dehan Atanásio Antonio da Silva ba Ajénsia TATOLI liuhusi entrevista iha nia knaar fatin, kuarta (21/11/2019).

Tanba ne’e, nia husu ba Governu Timor-Leste liuliu Ministériu Edukasaun atu tau-matan ba eskola privada ka eskola públika sira iha Timór laran tomak liuliu tenke haree ba kurrikulu, livru sira, no mós fasilidade eskola nian ne’ebé bele fasilita profesór no estudante sira iha prosesu aprendijazen nia laran ne’e.

“Ita labele ejize de’it ba rekursu profesór sira-nian maibé ninia nesesidade ne’e la benefisia. Ne’e problema boot ida. Ema hakarak fó nia fuan boot no fó nia laran atu ba hanorin. Maibé to’o fulan, nia ba antrian, la sufisiente ba ninia hanorin no ba saida mak nia esforsu ne’e mós, problema boot ida,” nia dehan.

Maske nune’e, nu’udar manorin nia apela alunu sira ne’ebé eskola iha fatin ne’ebé de’it iha Timór laran tomak katak Eskola Paulo VI odamatan nakloke ba ema hotu, liuliu ba sira ne’ebé akaba ona Eskola Ensinu Pre-Sekundária bele mai eskola iha Eskola Paulo VI tanba parte eskola sei la halo teste.

“Iha tinan 2019 ba kotuk eskola halo teste maibé tinan ne’e la halo teste. Ezemplu, teste duni maibé sira mai para priense de’it formuláriu. Husi ne’e ami avalia ona. Tanba, barak liu iha universidade sira, lamenta tanba labarik sira ba iha universidade lee la hatene. Maibé, ami halo nusa para pelumenus ema ne’ebé hatene ona lee, bele tama eskola ida no sira ne’ebé la hatene lee pasiénsia ami labele simu. Tanba, bainhira mosu iha universidade seluk, bele prejúdika eskola nia dignidade,” nia hateten.

Tanba, nia hatutan, Eskola Paulo VI la’ós hanorin ka eduka estudante sira atu sai matenek de’it maibé maibé importante mak hanorin estudante sira iha morál atu respeita inan-aman no iha responsabilidade morál atu responsabiliza ba saida mak sira ko’alia no saida mak sira halo.

“Ita haree, labarik sira hanesan respeita malu laiha no liafuan tolok sira ne’ebé loloos uluk la uza maibé agora sira uza hodi tolok malu halimar. Tanba ne’e, tuir Eskola Paulo VI nia misaun no vizaun mak edukasaun karakter ninian para pelumenus estudante ramata eskola, ba hanesan la matenek maibé aprezentasaun hanesan ema,” nia esplika.

Notísia relevante:Perfil Eskola Sekundária Iha Dili: Eskola Sekundária Jerál (ESG) Katólika Paulo VI-(VIII)

Jornalista : Nelia Fernandes

Editór      : Rafy Belo

 

HAKEREK NO HATÁN

Please enter your comment!
Please enter your name here