Estudante Paulo VI baihira iha sala-de-aula. Foto TATOLI: Nelia Fernandes

DILI, 23 outubru 2019 (TATOLI)-Eskola Sekundária Jerál (ESG) Katólika, Paulo VI hetan instalasaun wifi gratuitu husi empreza telekomunikasaun Timor Telecom (TT) hodi profesór no estudante sira bele asesu informasaun sira bainhira hetan difikuldade iha referénsia, hanesan livru.

“Agora daudauk tempu teknolojia, ne’ebé bainhira iha livru nian laran sira hasoru problema sira bele buka ona google. Iha ne’e mós husi TT nian mós fó ona gratuitu ba internet ninia. Fasil ba profesór sira bele loke google para haree saida mak sira iha difikuldade,” dehan Adjuntu Diretór ESG Paulo VI, Atanasio Antonio da Silva ba Ajénsia TATOLI iha nia kna’ar fatin, tersa ne´e.

Maske nune´e,  Adjuntu Diretór Eskola ne´e hateten, difikuldade ne’ebé sira-nia eskola enfrenta  mak livru sira.

“Livru ne’e ita bele ko’alia katak se ita uza de´it livru ida, bainhira kuandu lee iha laran hasoru problema, ita labele halo buat ida tanba la iha referénsia seluk maibé loloos ne’e iha referénsia seluk,” konsidera manorin na´in ne´e.

Iha parte seluk, Adjuntu Diretór ESG Paulo VI, Atanasio António da Silva  ne’e relata katak Eskola ESG Paulo VI, prosesu aprendizajen iha estabelesimentu ensinu privadu ne´e la’o ho di’ak. “Prosesu aprendizajen primeiru kria kondisaun uluk mak orariu atu hanorin ninian, depois ami nuntut (ejize) ba profesór sira atu prepara sira-nia matéria atu hanorin”.

“Hanesan iha universidade hanorin ona sira oinsá atu halo sira-nia preparasaun ba hanorin ninian, entaun ida ne’e ami tenke haree oráriu ne’e mak primeiru haree kona-ba oras,” nia reforsa tan.

Adjuntu diretór ne’e informa tan katak prosesu aprendizajen kuandu ita kria ona oráriu ba profesór sira, profesór sira tama tuir oras ne’ebé determinadu, ne’ebé profesór hotu iha ona oráriu.

“Aluno sira husi 12 : 30 to’o 3 oras sira nafatin iha sala laran. Profesór sira mak bele troka. To´o iha 3 oras rekreiu depois tama fali, sira eskola tan oras tolu, ne’ebé ami tama 12:30 to’o fali 5:30,” informa edukadór ne´e.

Manorin ne’e salienta liután, ESG Paulo VI nia aprendizajen la iha problema; iha tinan ida ne´e terseiru ano mak uza jiz maibé tinan oin mai hothotu la uza jiz no tinan ida ne’e primeiru no segundu ano hothotu uja ona, dashboard.

“Ne’ebé estudante sira mós ami haruka sira prepara hotu laptop atu nune’e saída mak profesór sira hanorin iha dashboard ne’ebá sira labele kópiaentaun sira bele fó flash ba profesór sira, bele send (haruka) ba sira-nia flash depois ba estuda iha uma”.

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here