Lista Dadur Atu Hetan Indultu La Inklui Eis Membru Governu
DILI, 08 novembru 2019 (TATOLI)-Ministru Justisa (MJ), Manuel Cárceres da Costa, ohin, informa, nia parte haruka ona lista dadur na’in 30-resin ba Gabinete Prezidente Repúblika (GPR) atu bele hetan indultu iha komemorasaun loron proklamasaun independénsia, 28 novembru 2019.
Ministru Manuel Cárceres da Costa konfirma katak, nia la lembra prezu sira ne’e nia naran ida poor ida, maibé hosi lista prezu na’in 30-resin ne’ebé Governu rekomenda atu hetan indultu ne’e, la inklui eis membru Governu João Câncio Freitas, Francisco da Costa Soares “Borlaku” ho Abilio Lima.
Notísia Relevante : PR Fó Indultu Parsiál Ba Prizioneiru 15, La Inklui Eis Governante
Lista dadus sira ne’e foti hosi dadur sira ne’ebé komportamentu di’ak iha Prizaun Becora, Munisípiu Dili, Prizaun Gleno, Munisípiu Ermera ho Prizaun Suai, Munisípiu Covalima.
Governu ninia kna’ar maka halo identifikasaun dadus no prosesu hodi hato’o lista pedidu ne’e ba Xefe Estadu, Maibé atu aprova ka rejeita ne’e desizaun Prezidente Repúblika ninian.
Notísia Relevante : Governu Haruka Ona Lista Indultu Ba PR
“Prosesu barak tama ona iha GPR para husu komutasaun pena. Ha’u ladún lembra nia númeru, maibé iha prosesu ne’e prizioneiru nain 30-resin mak ami haruka ona ba GPR,” informa Ministru Justisa, Manuel Cárceres da Costa, ba Jornalista sira iha ninia servisu fatin, Caicoli, Dili.
Notísia Relevante : Prizaun Gleno Propoin Indultu ba Dadur Na’in-21 iha Proklamasaun Independénsia
Manuel Cárceres da Costa, esplika, rekizitu atu hetan indultu no komutasaun pena, tenke kumpre metade pena hosi totál, iha komportamentu di’ak, problema saúde, idade no problema sosiál seluk-tan.
Notísia Relevante : Komportamentu Di’ak Mak Dalan Hodi Hetan Perdaun
Nia dehan, dadur ho família dadur, advogadu, diretór Estabelesimentu Prizaun sira maka tenke hatama pedidu indultu no komutasaun pena ba Ministériu Justisa hodi prosesa no kontinua haruka ba Prezidente Repúblika atu dekreta.
Jornalista : Nelson de Sousa
Editór : Francisco Simões
