Ministru Justisa, Manuel Cárceres da Costa. Imajen Egas Cristovão

DILI, 10 maiu 2019 (TATOLI ) – Governu liuhusi Ministériu Justisa (MJ), haruka ona lista indultu ba dadur sira husi prizaun tolu, hanesan Bekora, Glenu no Suai ba Prezidente Repúblika (PR), Francisco Guterres Lú Olo, hodi estuda antes fó indultu.

Tuir pedidu ne’ebé Ministru Justisa, Manuel Cárceres da Costa, dadur hamutuk na’in 60, maibé daudaun ne’e na’in 30 mak haruka uluk ona ba Xefe Estadu.

Manuel Cárceres da Costa esplika: “La’ós governu maka husu indultu, lei númeru 5/2016 artigu 7 alínea d, hateten Ministru Justisa hato’o de’it prosesu, pedidu indultu bele mai husi dadur, dadur nia família, defeza, husi ospitál, se dadur moras, no mós rede sosiál ne’ebé ajuda re-insersaun sosiál ba sira. Tanba ne’e haruka ona lista ba Prezidente Repúblika”, katak.

Governante ne’e esplika lei indultu hateten klaru; prizioneiru ne’ebé komete kazu violénsia menór idade, omisídiu agravadu, korrupsaun boot labele hetan indultu. Maibé iha sorin seluk husi lei ne’e mós dehan dadur ne’ebé komete krime kuandu moras ho razaun umanitária bele hetan indultu.

“Kritéria ba dadur ne’ebé hetan indultu maka, tenke kumpre ona um terço de pena ou tanba razaun umanitária katak kestaun ida no moras, tanba liafuan indultu katak perdaun”, afirma Cárceres.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here