Atividade dadur sira iha Prizaun Gleno. Imajen Tatoli/António Gonçalves

ERMERA, 05 novembru 2019 (TATOLI) – Falta loron hirak atu tama iha selebrasaun tinan 44 loron Proklamasaun Independénsia (28 november 1975-28 november 2019), Prezidente Repúblika, Francisco Guterres ‘Lú Olo’ sei fó indultu ba dadur sira.

Tuir Lei ne’ebé vigora iha Timor-Leste, Prezidente Repúblika iha kompeténsia atu fó indultu ba dadur sira iha loron nasionál, tuir Dekretu Prezidénsia Repúblika númeru 11/2018 ne’ebé determina ona loron indultu ba dadur ne’ebé sei akontese iha loron Proklamasaun Independénsia 28 novembru kada tinan no loron Restaurasaun Independénsia 20 maiu.

Diretór Estabelesimentu Prizionál Gleno, Nito dos Santos, hateten ba Prizaun Gleno propoin ona dadur na’in-15 no hosi família no advogadu propoin na’in-neen.

Diretór Estabelesimentu Prizionál Gleno, Nito dos Santos. Imajen Tatoli/António Gonçalves

“Hamutuk dadur na’in-21 maka ita propoin ba Prezidente Repúblika, maibé ida-ne’e kabe ba kompeténsia Prezidente Repúblika. Ami hanesan tékniku propoin ona ami nia lista ba Ministériu Justisa hodi kanaliza ba Gabinete Prezidente Repúblika. Ita propoin atu sira hetan direitu indultu ka komutasaun pena iha loron 28 novembru”, tenik Diretór ne’e ba Agência Tatoli iha Prizaun Gleno, tersa ne’e.

Nia dehan, husi lista dadur ne’ebé propoin ona ba Xefe Estadu, iha feto na’in-rua no mane na’in-19.

Tuir Lei númeru 5/2016 kona-ba prosedimentu legál ba indultu no komutasaun pena define proponente sira mai hosi dadur, família dadur, advogadu, defensór públiku no mós diretór estabelesimentu prizionál sira.

Ba lista dadur ne’ebé atu simu indultu, Diresaun Nasionál Servisu Prizaun no Re-insersaun Sosiál sei halo avaliasaun ba komportamentu dadur, elaborasaun relatóriu sosiál, deklarasaun ho sentimentu hosi dadur rasik, hafoin relata ba Ministru Justisa hodi kontinua haruka ba Tribunál hodi hetan paresér jurídiku hafoin lori ba Prezidente Repúblika hodi foti desizaun.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here