Drukair Royal Bhutan Airlines ne'ebé halo operasaun ho rute Dili-Singapura. Imajen/Natalino Costa.

DILI, 31 outubru 2019 (TATOLI) – Drukair Royal Bhutan Airlines hahú ona nia sasemok dahuluk husi Timor-Leste bá Singapura.

Iha lansamentu, ohin, ba vou primeiru Airbus A319 ne’e, Ministru Transporte no Komunikasaun (MTK), José Agostinho da Silva, hateten Governu reativa ona aviaun rute Singapura mai Timor-Leste.

“Ida ne’e nu’udar polítika no esforsu ne’ebé Governu Timor-Leste halo hodi hahú konetividade iha setór transporte aéreu mai ita-nian rai. Tanba ita hakarak halo diversifikasaun iha setór transporte aéreu”, dehan Ministru Jóse Agostinho iha aeroportu Komoro.

Tanba ne’e, hodi Governu nia naran apresia ba kompañia Air Timor, ho nia esforsu bele charter ka aluga tan aviaun mai Timor-Leste hodi fasilita sidadaun sira bá-mai.

“Ami apresia ba esforsu Air Timor nian tanba hahú ona normaliza no reativa rute Singapura-Dili liuhusi Royal Bhutan Airlines. Ida ne’e, nu’udar pasu pozitivu”, dehan governante ne’e.

Iha fatin hanesan, Prezidente Air Timor, Francisco Rego Oliveira, afirma aviaun ne’e sira maka aluga husi nasaun Bhutan.

Ne’ebé kontrata durante tinan ida no aviaun ne’e iha kondisaun di’ak bele halo operasaun bá-mai Dili-Singapura ne’ebé akumula pasajeiru klase VIP no ekonomia hamutuk 118, enkuantu presu billete ba aviaun rasik mak $277.

Aviaun ne’e, sei halo nia operasaun iha Timor-Leste bá Singapura semana ida dala rua mak kinta no domingo no halo atividade hahú husi data lansamentu ne’e.

Aviaun Royal Bhutan, ohin,  husi Singapura no to’o iha aeroportu Dili tuku 07:35 dadeer hodi lori diretór ezekutivu ka CEO Bhutan nian ho nian delegasaun sira ne’ebé akompaña husi eis Prezidente Repúblika José Manuel Ramos Horta.

Serimónia lansamentu ne’e hetan partisipasaun husi Prezidente Autoridade Aviasaun Sivíl Timor-Leste, Prezidente Ajénsia Nasionál Aviasaun Timor-Leste, korpu diplomátiku no konvidadu sira seluk.

Notísia relevante : Royal Air Bhutan Sei Halo Nia Vou Dahuluk iha 31 Outubru

AACTL Atribui “Flight Approval” ba Royal Air Bhutan Semo Dili-Singapura

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here