Prezidente Autoridade Avisaun Civil Timor- Leste, Ana Rosália Ximenes Varela. Imajen/Natalino da Costa.

DILI, 17 outubru 2019 (TATOLI) – Aviaun Royal Air Bhutan ne’ebé hetan ona lisensa husi Autoridade Nasionál Aviasaun Sivíl Timor-Leste (AACTL, sigla portugés) semo Dili-Singapura sei halo nia vou dahuluk iha 31 outubru 2019.

“Sira komesa halo operasaun hahú iha 31 outubru agora, sira semo semana ida dala rua, kinta no domingu. Aviaun ne’e, mai husi Singapura tuku tolu madrugada to’o Timor-Leste 7:45 dadeer oras Timor-Leste”, Prezidente AACTL Ana Rosália Ximenes Varela informa iha Kaikoli, ohin.

“Enkuantu ami fó kontratu operasaun fulan tolu iha faze esperimentu, ami haree di’ak entaun ba fulan neen no prolonga to’o tinan ida sira halo atividade semo husi Dili bá Singapura”, katak.

Ana Rosália haktuir husi sasemok dahuluk Singapura mai Timor-Leste ekipa téknika AACTL sei tun hodi inspesiona kondisaun aviaun nian. Tanba iha kritéria tolu tuir International Civil Aviation Organization (ICAO) ne’ebé aplika ba nasaun hotu bainhira aviaun ida halo operasaun iha rai ida tenke prienxe mak certificate of air katak aviaun ne’e bele semo ka lae, certificate of registration ka sertifikadu ba rejistrasaun no insurance ka seguru.

Husi tékniku AACTL sei haree ida ne’e bainhira aviaun Bhutan halo nian primeiru vou iha Timór bá Singapura iha 31 outubru ne’e.

Notísia relevante : AACTL Atribui “Flight Approval” ba Royal Air Bhutan Semo Dili-Singapura

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here