Foto/Google.

DILI, 17 outubru 2019 (TATOLI) – Prezidente Autoridade Nasionál Aviasaun Sivíl Timor-Leste (AACTL, sigla portugés), Ana Rosália Ximenes Varela, informa ofisialmente atribui ona aprovasaun vou ka flight approval ba aviaun ho naran Royal Air Bhutan hodi komesa halo nian operasaun rute Dili-Singapura.

Ana Rosália esplika bainhira AACTL fó lisensa semo ba empreza aérea ne’e tenke haree ba iha aviaun ne’e charter ka designate flight. Hanesan ba aviaun Royal Air Bhutan ne’e charter flight tenke kompleta dokumentu hanesan application letter operator ka karta kandidatura ba operasaun, call sign, route, registration no purpose of flight ka objetivu husi semo. Tanba husi Royal Bhutan prienxe ona rekizitu ne’e maka Aviasaun Sivíl fó ona lisensa.

“Dezde iha fulan-agostu husi Air Timor sira hatama sira nian aplikasaun mai iha ami hakarak charter aviaun ka aluga aviaun mai iha Timor-Leste hodi halo operasaun iha Timór no ami estuda no verifika sira-nia dokumentu haree katak sira prienxe rekizitu ne’ebé tuir ACCTL husu no ami deside fó lisensiamentu ka flight approval ba Royal Air Bhutan”, dehan Ana Rosália ba Ajénsia Tatoli iha nia knaar fatin Kaikoli, ohin.

Nia dehan dokumentu husi empreza aviasaun ne’e husi parte AACTL rasik halo verifikasaun ida pur ida ho rigór tebes.

“Kuandu iha ami-nia verifikasaun ne’e maka hetan dokumentu balun la kompletu, entaun ami labele fó flight approval, maibé sira mai kedan ho dokumentu lisensa negósiu husi SERVE, ami fó ba sira”, dehan nia.

Tuir Ana Rosália, aplikasaun ne’ebé maka aprezenta husi Air Timor tanba nia maka  aluga aviaun ne’e mai iha Timor-Leste, iha sira nian karta ne’e rasik husu atu sira halo operasaun semo husi Dili bá Singapura no husi ACCTL aprova hodi fó ba sira semo semana ida dala rua, kinta no domingu.

Antes atu submete karta ba AACTL, ekipa husi empreza aérea ne’e mós akompaña husi Air Timor mai hasoru malu ho AACTL hodi ko’alia.

“Foin daudaun husi parte Royal Air Bhutan ninia autoridade sira mai hasoru malu ho ami hodi ko’alia kona-ba prosesu aviaun ne’e no sira liu bá haree mós ita-nia kondisaun aeroportu bainhira sira nian aviaun atu mai halo operasaun iha ne’e”, haktuir Prezidente AACTL ne’e.

Nia salienta, kompañia aviasaun ne’e mós hatudu prontidaun hodi haruka nia aviaun mai halo atividade iha Timor-Leste.

Entretantu kona-ba presu billete ba aviaun ne’e, Ana Rosália afirma tanba nian kategoria charter flight, la’ós designate flight, entaun ida ne’e autoridade Bhutan maka sei ko’alia fali ho Air Timor tanba nia maka aluga, maibé sira sei informa fali ba AACTL nune’e bele hatene folin billete ne’e.

Prezidente ne’e salienta nu’udar autoridade ne’ebé regula aviasaun sivíl iha Timor-Leste ho nian papél garante saving and security maka iha loron 7 novembru sei bá Singapura hodi hasoru mós autoridade Bhutan.

Objetivu husi hasoru malu ho autoridade Bhutan ne’e atu konfirma loloos dokumentu komprovativu Royal Air Bhutan nian ne’ebé submete mai AACTL.

Iha sorin seluk, Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, informa  nia parte simu ona dokumentu husi aviaun Royal Air Bhutan atu halo operasaun iha Timor-Leste.

“Foin daudaun Air Timor maka lori empreza aviasaun ida husi Singapura hodi lori sira nian aviaun mai Timor-Leste”, katak nia.

Nune’e husi SERVE apoiu tebes tanba presiza iha aviaun ne’e atubele kompete iha área negósiu nian.

“Lei rejistu negósiu nian permite atu empreza ne’e la presiza rejistu nian kompañia iha Timor-Leste, maibé nia bele liu fali husi kompañia seluk hanesan Air Timor mós laiha buat ida, ami apoiu”, dehan nia.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here