Presidente Konsellu Administrasaun BNCTL, Brígido de Sousa.

DILI, 30 outubru 2019 (TATOL) – Prezidente Konsellu Administrasaun BNCTL, Brígido de Sousa, hateten Governu propoin millaun $11 hodi kapitaliza Banku Nasionál Komérsiu Timor-Leste (BNCTL, sigla portugés).

“Ami la prevee, hato’o proposta ne’e maka Governu iha kazu ne’e maka reprezentante banku nian propoin ba Parlamentu. Ha’u lahatene montante loloos ne’e hira? Maibé hamutuk millaun $11. Osan ne’e atu kapitaliza banku signifika aumenta tan kapitál banku”, hateten Brígido de Sousa ba Tatoli iha Parlamentu Nasionál, ohin.

Para banku halo servisu hodi fó investimentu, bele fó kréditu boot liu uitoan, kobre ba risku sira hanesan fó kréditu maka paradu, entaun kapitál ne’e funsiona hodi kobre.

“Aléinde ne’e investe iha teknolojia, edifísiu di’ak hodi atende ema ho di’ak, servisu ho lalais. Importante liuhosi kapitál ne’e idéntiku ho reputasaun banku nian tanba banku ne’ebé nia kapitál boot entaun nia reputasaun ou ema dehan katak nia klase no rating ne’e mós aas, entaun ema haree katak banku ida ho nia kapitál boot, konfiansa ba banku ne’e boot liután. Ezemplu, BNCTL nia kapitál ki’ik, dala ruma ema atu mai investe mós sei dúvida”, afirma Brígido.

Tuir Prezidente Konsellu Administrasaun katak verba millaun $11 ne’e relativa, BNCTL loloos presiza montante boot liután, tanba demanda kréditu ne’e boot tebes, se kapitál BNCTL forte, bele fó kréditu barak liu.

“Maibé, ami mós tenke konxiente katak Governu la’ós haree de’it BNCTL, iha prioridade barak, entaun saida maka Governu propoin ami simu no ami sei jere ho didi’ak para fó fali retornu depende espetativa hosi asionista”, katak Brígido.

Brígido salienta, durante ne’e BNCTL halo operasaun ho kapitál ne’ebé asionista injeta hamutuk millaun $30. Hosi montante ne’e, BNCTL fó fila ona ba Governu kuaze millaun $15 katak porsentu 50 BNCTL devolve.

Osan sira ne’e hosi operasaun banku nian tinan-tinan, ne’ebé durante tinan hitu nia laran konsege akumula besik millaun $15 no osan ne’e Governu nian, ne’ebé bele foti kualkér tempu tau fali ba reseita Estadu.

Orsamentu ne’ebé aloka ba BNCTL iha 2019 hamutuk millaun $5 no kréditu ne’ebé BNCTL fó hosi janeiru to’o setembru besik millaun $47.

“Signifika katak millaun $5 ne’ebé Estadu tau hanesan kapitál iha BNCTL kada $1 bele halo fali $10, tanba ne’e maka banku ho millaun $5 agora daudauk bele fó kréditu maske osan ne’e mós mai hosi depózitu kliente sira-nian, maibé sein iha kapitál ida forte konserteza ami labele fó kréditu boot”, katak Brígido.

Notísia relevante : BNCTL fó Fila Millaun $13 ba Governu

BNCTL Propoin Millaun $50 Iha 2020 Hodi Moderniza Sistema

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here