Prezidente Konsellu Administrasaun Banku Nasionál Komérsiu Timor-Leste (BNCTL), Brígido de Sousa. Imajen TATOLI/Jogerjo Guterres.

DILI, 16 jullu 2019 (TATOLI)- Durante ezisténsia Banku Nasionál Komérsiu Timor-Leste (BNCTL-sigla portugés) konsege fó fila osan hamutuk millaun $13 ba Governu.

Prezidente Konsellu Administrasaun BNCTL, Brígido de Sousa, informa kapitál ne’ebé Governu tau iha BNCTL hamutuk millaun $25 dezde 2002 (bainhira sei iha Mikro-Finansas hafoin iha 2011 transforma ba BCTL tuir dekretu lei 3/2011).

“Maibé hosi millaun $25 ne’e, BNCTL halo operasaun no tinan-tinan banku halo negósiu no hetan profit (lukru) no profit sira ne’e akumuladu iha kapitál hamutuk millaun $13 hosi millaun $25 ne’e, BNCTL konsege fó fila millaun $13 ba Estadu”, Brígido de Sousa ba TATOLI iha nia kna’ar fatin Timor plaza, tersa (16/7/2019).

Brígido hatutan osan ne’e tau iha kapitál BNCTL nian, maibé bainhira Governu hakarak foti bele. “Osan hamutuk millaun $13 ne’e hahú iha tinan 2011. Ne’ebé bele dehan katak osan ne’ebé tau ba BNCTL ne’e la lakon no nia retornu bele dehan katak boot liu investimentu ne’ebé tau iha Fundu Mina-rai”.

Osan ne’ebé Governu tau kada tinan iha BNCTL, benefisia ba komunidade sira tanba bele fó kréditu, depois banku fó filafali en termu lukru akumula hela iha kapitál ne’ebé maka pertense ba Governu.

“Iha tinan kotuk ami hatama reseita ba Estadu hamutuk millaun $1”,Brígido afirma.

Nia mós informa, funsionáriu BNCTL nian hamutuk 290 ne’ebé hala’o serbisu mós iha sukursál hotu, iha kapitál no mós munisipál.

Relasiona ho funsionáriu, Prezidente Konsellu Administrasaun ne’e dehan seidauk hanoin atu aumenta tanba banku sei aplika sistema dijitalizasaun no númeru ne’ebé iha sufisiente.

Jornalista: Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here