Prezidente Konsellu Administrasaun BNCTL, Brígido de Sousa. Imajen/Media PR

DILI 17 jullu 2019, (TATOLI)-Banku Nasionál Komérsiu Timor-Leste (BNCTL-sigla portugés) propoin millaun $50 hodi moderniza sistema banku nian, nune’e bele fó atendimentu di’ak liu ba kliente sira.

“Ami propoin millaun 50 iha tinan 2020, ho planu prioridade hanesan halo expansaun ba kréditu, hadi’a infraestrutura banku, ho teknolojia”, Prezidente Konsellu Administrasaun BNCTL, Brígido de Sousa, informa ba TATOLI iha nia servisu fatin Timor plaza, tersa (16/7/2019).

Brígido de Sousa dehan, ba BNCTL, tuir polítika no planu negósiu no mós polítika estratéjika banku nian hakarak atu husik atendimentu tradisionál sira hanesan ema tenke bá forma iha banku.

“Mas presiza uza mobile banking, internet banking no ami-nia funsionáriu sira ho kbiit uza tablet hodi tun direta bá área rurál hodi fó atendimentu”, Brígido afirma.

Nia salienta, moderniza sistema no hadi’a infraestrutura tanba edifísiu BNCTL maioria la’ós preparadu atu sai edifísiu ba banku nian.

Tanba ne’e maka hahú iha tinan kotuk, BNCTL komesa halo ona konstrusaun ba edifísiu foun sira, no hahú iha 2018-2022 BNCTL nian edifísiu tenke foun hotu.

BNCTL iha ona fatin (edifísiu) tolu hanesan iha Oekusi, Ainaru, no Ermera no iha 2019, iha Baukau, Maliana no Dili, nune’e mós sukursál sira.

Líder BNCTL ne’e afirma, banku atu sai forte presiza kapitál ida ne’ebé sufisiente, tanba ne’e maka hatudu banku ninia fundamentu no ema ida atu serbisu hamutuk ho banku sei haree uluk ida ne’e.

Ho kapitál ne’ebé forte banku bele halo expansaun, fó kréditu, investimentu internu hodi hadi’a atendimentu.

“Iha tinan kotuk ami propoin ba Governu atu tau kapitál ba BNCTL millaun $50. Ami halo aprezentasaun ba Konsellu Ministru no Parlamentu, maibé ikus mai hatún ba millaun $5. Ba ami, millaun $5 laiha buat ida bele reforma, no iha tinan 2019 mós nafatin, maibé ami kontinua propoin millaun $50 iha tinan 2020’’, katak.

Jornalista : Antónia Gusmão  

Editora : Maria Auxiliadora

HAKEREK NO HATÁN

Please enter your comment!
Please enter your name here