Atividade iha Jináziu Dili. Imajen TATOLI/Hortençio Sanchez

DILI, 28 outubru 2019 (TATOLI) – Kompañia lokál, Victoria Construction, Lda hetan fiar hosi Seretaria Estadu Juventude no Desportu (SEJD) hodi halo reabilitasaun ba Jináziu Dili, nune’e bele prepara ba jogu Komunidade ho Lian Portugés (CPLP-sigla portugués) ba dala XII ne’ebé sei hala’o iha Timor-Leste iha 14 to’o 24 jullu 2020.

Sekretáriu Estadu Juventude no Desportu, Nélio Isaac Sarmento, informa daudaun ne’e Governu asina ona kontratu ho kompañia no sira hahú ho ona serbisu.

Notísia Relevante: MEJD Estabelese Komisaun Interministeriál Ba Atividade Konferénsia Desportu CPLP

“Kona-ba Jináziu Dili, kompañia iha ona prosesu preparasaun atu nune’e bele halo ona serbisu tanba ha’u asina ona kontratu ho sira iha loron rua liubá ho durasaun fulan neen,” tenik Nélio ba Agéncia Tatoli iha resintu Parlamentu Nasionál (PN), segunda ne’e.

Alende ne’e, SEJD mós asina kontratu ho kompañia DVP Construction, Lda hodi halo kampu Vileiból Praia ne’ebé hanesan parte ida husi preparasaun ba jogu desportivu lusófonu nian.

Notísia Relevante: TL Hetan Rezultadu Pozitivu Sai Uma Na’in ba Jogu Desportivu CPLP

Totál orsamentu ba obra ne’e hamutuk $412.595,61, enkuantu orsamentu ba obra Voleiból Praia hamutuk$ 84.403,71.

Modalidade ne’ebé sei partisipa iha jogu desportivu ne’e maka Futeból, Voleiból Praia, Karatedo, Taekwondo, Basketból, no seluk tan.

Jogadór hosi modalidade Futeból ne’ebé sei partisipa iha jogu ne’e hosi idade 16 to’o 18.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here