Primeiru-Ministru, Taur Matan Ruak, prezide reuniaun Konsellu Ministru Extraordináriu, iha Palásiu Governu, Dili, tersa (09/07/2019). Imajen/Egas Cristovão

DILI, 10 jullu 2019 (TATOLI) – Ministériu Edukasaun Juventude no Desportu (MEJD) aprezenta Rezolusaun Governu ida hodi estabelese Komisaun Eventuál Interministeriál ba Koordenasaun Atividade iha ámbitu Konferénsia Ministru Juventude no Desportu ba Komunidade husi País ho Lian Portugés (CPLP-sigla portugés) nia no Jogu Desportivu CPLP ba dala XII iha Timor-Leste iha loron 14 to’o 24 jullu 2020.

Ministru Estadu no Prezidénsia Konsellu Ministru, Agio Pereira hateten, reuniaun ezekutivu aprova Rezolusaun ne’e.

Ministru Estadu Prezidénsia Konsellu Ministrus, Hermenegildo Augusto Cabral Pereira. Imajen/Egas Cristovão

“Liga ho Konferénsia Desportivu XII CPLP, Konsellu Ministru aprova kriasaun komisaun eventuál interministeriál hodi tau-matan ba prosesu ne’e tomak. Ne’e hanesan proposta mai husi Ministériu Edukasaun, Juventude no Desportu no Konsellu Ministru apoia ho integrasaun ministru barak iha komisaun ida ne’e hodi dezenvolve prosesu ne’e didi´ak hodi halo ita-nia Estadu nabilan,” tenik Ministru Agio Pereira iha Palásiu Governu, kuarta ne’e.

Alende ne´e, reuniaun ordináriu ne’e rona mós aprezentasaun husi MEJD hamutuk ho Sekretaria Estadu Juventude no Desportu (SEJD) kona-ba preparasaun Jogu Desportivu  CPLP ba dala XII.

Aprezentasaun ne’e kona-ba partisipasaun husi nasaun sira, modalidade, infraestrutura ne’ebé mak preparadu ona hanesan estádiu ba modalidade desportu ne’ebé diferente, alojamentu, transporte, servisu médiku, seguransa no seluk tan. “Aprezentasaun ne’e inklui mós aprezentasaun múzika ba  jogu CPLP XII ninia. Konsellu Ministru halo komentáriu maibé aprova”.

Ikus liu, ezekutivu sira fó poder tomak ba Ministra Edukasaun, Juventude no Desportu, Dulce de Jesus Soares, atu asina Proposta Alterasaun husi akordu kooperasaun.

“Konsellu Ministru fó poder tomak ba Ministra Edukasaun Juventude no Desportu atu asina alterasaun akordu kooperasaun iha domíniu juventude no desportu CPLP ninian hodi bele kombina prosesu ne’e sira hotu no asegura ita-nia responsabilidade ba XII jogu CPLP iha susesu tomak,” dehan governante ne´e.

Alterasaun akordu ne’e sei aprezenta iha konferénsia ba dala XII husi Ministru Juventude no Desportu CPLP, ne’ebé sei hala’o iha Luanda, Angola iha loron entre 22 no 24 jullu 2019.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here