Sekretáriu Estadu Juventude no Desportu (SEJD), Nélio Isaac Sarmento. Imajen/António Gonçalves

DILI, 25 Jullu 2019 (TATOLI)–Sekretáriu Estadu Juventude no Desportu, Nélio Isaac Sarmento, hateten Timor-Leste hetan rezultadu di’ak bainhira sai uma na’in ba Jogu Desportivu Komunidade Nasaun Ko’alia Lian Portugeza (CPLP-sigla portugues) ba dala XII, iha Timor-Leste, ne’ebé sei realiza iha 14-24 jullu 2020.

Nélio esplika, hetan rezultadu pozitivu tanba Ministru Juventude no Desportu CPLP sira hotu iha kompromisu atu haruka sira-nia delegasaun boot mai Timor-Leste (TL) hodi partisipa iha eventu boot refere.

 “Ita hetan ona rezultadu pozitivu tanba Ministru Juventude Desportu CPLP sira konkorda atu haruka sira-nia delegasaun mai hodi tuir eventu desportiva ne’e,” tenik Nélio ba Agência Tatoli iha salaun Xanana Sport Center, Bairro Formosa, Dili, kinta ne’e.

Nia informa, Ministra Edukasaun, Juventude no Desportu, Dulce de Jesus Soares ho ninia ekipa partisipa ona iha Konferénsia XII Ministru Juventude no Desportu CPLP sira ne’ebé realiza iha Luanda, Angola, entre loron 23 no 24 jullu no bainhira fila hikas mak sei fó informasaun detalla kona-ba desizaun konferénsia ne’e.

“Agora dadauk, Ministra Dulce ho ekipa ida sei iha hela Angola hodi ko’alia kona-ba eventu ne’e rasik. Sira fila mai foin ita hetan informasaun klaru kona-ba ida ne’e,” nia katak.

Nélio esplika, modalidade deport ne’ebé sei partispa iha jogu ne’e maka hanesan Futeból, Voleiból, Basketból, Taekwondo, Atletizmu, Karatedo no Badminton. Entretantu, jogadór hosi modalidade Futeból ne’ebé partisipa sei iha jogu ne’e hosi idade 16 to’o 18.

Kondisaun no fatin ba realizasaun eventu internasionál ne’e, nia haklaken, Governu kria ona komisaun interministerial hodi halo preparasaun no iha tempu besik Governu sei halo reabilitasaun ba Zinájiu Dili, nune’e tinan oin bele realiza eventu boot ne’e.

Eventu Desportivu CPLP ne’e sei partesipa hosi nasaun CPLP hotu hanesan Angola, Brazíl, Cabo Verde, Guiné Bissau, Guiné Equatoriál, Moçambique, Portugal, São Tomé e Príncipe no Timor-Leste.

Jornalista: Hortencio Sanchez

Editór: Xisto Freitas

Notísia relevante: MEJD Estabelese Komisaun Interministeriál ba Atividade Konferénsia Desportu CPLP

HAKEREK NO HATÁN

Please enter your comment!
Please enter your name here