Ministru Obra Públika (MOP), Salvador Eugénio Soares dos Reis Pires, hala’o audiénsia ho deputadu Komisaun E no C hodi konsulta OJE 2020. Imajen/Florencio Miranda Ximenes.

DILI, 28 outubru 2019 (TATOLI) – Prezidente Komisaun E ne’ebé trata asuntu infraestrutura, Abel Pires, husu ba Ministériu Obra Públika (MOP) atu hadi’a lalais auto estrada ne’ebé hetan estragu tanba kauza husi dezastre naturál.

“Ita presiza hatene bainhira mak Ministériu Obra Públika hadi’a auto estrada ne’ebé hetan ona estragu tanba ho razaun dezastre naturál ne’e”, Prezidente Komisaun E ne’e afirma bainhira halo audiénsia ho Ministru Obra Públika, Salvadór Eugenio Soares dos Reis Pires, iha Plenária Parlamentu Nasionál, ohin.

Abel Pires dehan presiza halais reabilitasaun tanba Konsellu Ministru mós aprova ona deliberasaun retensaun ba auto estrada.

Membru Komisaun E, Adriano do Nascimento, dehan projetu auto estrada ne’e fó impaktu tebes ba abitante sira ne’ebé besik área ne’e tanba laiha dalan alternativa ida atu populasaun bele liu hodi halo atividade loroloron nian.

“Ha’u haree komunidade iha área ne’ebá atu ba to’os no natar inklui buat seluk liuhosi mota laran ka auto estrada okos, ne’ebé husu konstrui estrada alternativu ida atubele fasilita komunidade sira iha área refere”, sujere.

Hatán ba kestaun ne’e, Ministru Obra Públika (MOP), Salvadór Eugénio Soares dos Reis Pires, hatete hein hela vistu préviu husi Kámara Konta atu hala’o reabilitasaun ba auto estrada ne’ebé kotu iha Fatukai to’o ponte Mola iha Suai.

MOP salienta Konsellu Ministru aprova ona proposta deliberasaun ba retensaun auto estrada, maibé sei hein Tribunál Konta fó vistu préviu hafoin halo retensaun.

“Ami planu ona katak reabilita auto estrada no presiza konstrui estrada alternativu rua atu komunidade bele ultrapasa husi auto estrada tanba difikulta tebes sira”, katak.

Governu mak sei toma responsabiliza halo retensaun ba auto estrada ho kustu orsamentu millaun $1-resin tanba auto estrada ne’e kotu impaktu husi dezastre naturál.

Daudaun, nia adianta katak ekipa téknika kompañia hahú prepara aan atu halo retensaun bainhira Tribunal Konta fó vistu préviu.

Konsellu Ministru aprova ona proposta deliberasaun ba retensaun auto estrada Suai husi Fatukai to’o Mola ne’ebé hetan estragu tanba dezastre naturál ne’ebé proposta alterasaun ne’e aprezenta husi MOP ba kontratu konstrusaun auto-estrada Suai ho númeru ICB/007/MPNR-2013 selebra ho konsórsiu Xina Overseas Engineering Group Co, Ltd no Xina Railway First Group Co, Ltd, ne’ebé sesaun I Suai hahú retensaun husi Fatukai to’o mota Mola.

Auto estrada Suai inaugura iha loron 17/11/2018, husi Ministru Salvador Eugénio Soares dos Reis Pires ho Ministru Estadu Prezidénsia Konsellu Ministru, Hermenegildo Augusto Cabral Pereira “Agio Pereira”, husi Fatukai-Zumalai ho kilómetru 30,3 ho totál orsamentu hamutuk millaun $304.

Notísia relevante : MOP Hein Vistu Préviu Reabilita Auto Estrada Suai

KM Aprova Deliberasaun Retensaun Ba Auto-Estada Suai

Jornalista : Florencio Miranda Ximenes

Editora :Maria Auxiliadora

HAKEREK NO HATÁN

Please enter your comment!
Please enter your name here