Auto Estrada iha Suai ne'ebé monu tanba udan boot, foin allais ne'e. Imajen/Eugénio Pereira

DILI, 10 jullu 2019 (TATOLI)—Enkontru Konsellu Ministru (KM), kuarta ohin, aprova ona proposta deliberasaun ba retensaun auto-estrada hosi Fatukai to’o Mola, Suai, ne’ebé hetan estragu tanba dezestre naturál.

Proposta deliberasaun ne’e aprezenta hosi Ministériu Obra Públika (MOP) ba kontratu hosi konstrusaun auto-estrada Suai númeru ICB/007?MPNR-2013 ne’ebé selebra ho konsórsiu China Overseas Engineering Group Co.Ltd no China Railway First Group Co.Ltd ne’ebé sai sesaun I Suai hahú retensaun hosi Fatukai to’o Mola.

Ministru Estadu Prezidénsia Konsellu Ministru, Hermenegildo Augusto Cabral Pereira, dehan MOP fó opsaun rua ba Konsellu Ministru, ida, hahú fali aprovizionamentu tomak no halo konkorsu hodi haree kompañia ida ne’ebé mak manán no, rua, halo de’it alterasaun ba kontratu ne’ebé mak eziste ho kontratu ba kompañia konsultór.

“Auto-estrada ne’ebé estragu, balun sei kontinua responsabiliza hosi kompañia kontratór no balun responsabiliza hosi Estadu Timor-Leste nian atu hadi’a tanba hetan estragu hosi dezastre naturál,” katak Ministru Agio iha Palasiu Governu, ohin.

Ho nune’e, governante ne’e haklaken Konsellu Ministru konkorda halo esesaun kontratu sujeitu no hein aprovasaun préviu vistu hosi Kámara Kontás nian, molok hala’o retensaun ba auto-estrada.

Antes ne’e, Ministru Obra Públika (MOP), Salvador Eugénio Soares dos Reis Pires, informa governu mak sei toma responsabilidade hodi retensaun ba auto-estrada ne’ebé kotu iha Suai ho kustu orsamentu miliaun $1 resin tanba auto-estrada ne’e kotu impaktu hosi dezastre naturál.

Auto-estrada Suai inauguradu iha loron 17/11/2018, ne’ebé inaugura hosi Ministru Obra Públika, Salvador Eugénio Soares dos Reis Pires ho Ministru Estadu Prezidénsia Konsellu Ministru (MEPKM), Hermenegildo Agio Pereira, ne’ebé distánsia auto-estrada ne’e ho kilómetru 30.3 ne’ebé liga hosi Fatukai-Zumalai ho totál orsamentu ne’ebé gasta ona ba obra ne’e hamutuk milliaun $304.

Jornalista: Florencio Miranda Ximenes

Editór: Xisto Freitas

HAKEREK NO HATÁN

Please enter your comment!
Please enter your name here