Ministru Obra Públika, Salvador Soares dos Reis Pires. Imajen António Gonçalves

DILI, 02 agostu 2019 (TATOLI)-Ministru Obra Públika (MOP), Salvadór Eugénio Soares dos Reis Pires,  hatete hein hela vistu préviu husi Câmara de Contas atu hala’o reabilitasaun ba auto estrada ne’ebé kotu iha Fatukai to’o ponte Mola iha Suai.

“Ita-nia Konsellu Ministru aprova ona proposta deliberasaun ba retensaun auto estrada, maibé ita sei hein Tribunal Contas fó vistu préviu hafoin halo retensaun,” Ministru Obra Públika ba jornalista sira iha Novo Turismo, Lecidere, ohin.

Ministru Salvadór dehan, Governu mak sei toma responsabilidade hodi halo retensaun ba auto estrada ne’ebé kotu ho kustu orsamentu millaun $1-resin tanba auto estrada ne’e kotu impaktu husi dezastre naturál.

Daudaun, nia adianta katak ekipa tékniku kompañia hahú prepara aan atu halo retensaun, bainhira Tribunal de Contas fó vistu préviu.

Antes ne’e, Konsellu Ministru aprova ona proposta deliberasaun ba retensaun auto estrada Suai husi Fatukai to’o Mola ne’ebé hetan estragu tanba dezastre naturál.

Proposta alterasaun ne’e aprezenta husi Ministériu Obra Públika (MOP) ba kontratu husi konstrusaun auto-estrada Suai númeru ICB/007?MPNR-2013 ne’ebé selebra ho konsórsiu Xina Overseas Engineering Group Co.Ltd no Xina Railway First Group Co.Ltd  ne’ebé sai sesaun I Suai hahú retensaun husi Fatukai to’o mota Mola.

Auto estrada Suai inaugura iha loron 17/11/2018, husi Ministru Obra Públika, Salvador Eugénio Soares dos Reis Pires ho Ministru Estadu Prezidénsia Konsellu Ministru (MEPKM), Hermengildo Augosto Cabral Pereira “Agio Pereira”, husi Fatukai-Zumalai ho kilómetru 30.3 ho totál orsamentu hamutuk millaun $304.

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here