Karreta Prado Parlamentu Nasionál (PN). Imajen/Dok.TATOLI

DILI, 22 outubru 2019 (TATOLI) -Kondenada eis Ministra Finansa, Emilia Pires, dala ida ne’e, nia naran temi tan iha audiénsia julgamentu iha Tribunal Distritál Dili (TDD), ohin, kona-ba kazu sosa karreta prado Parlamentu Nasional iha tinan 2008-2009.

Notísia Relevante : Kazu Karreta Prado PN, Simu Orientasaun Hosi Saudozu La Sama

Liuhosi audiénsia julgamentu ba kazu sosa karreta prado ne’ebé envolve eis Prezidente Parlamentu Nasionál, Vicente Guterres ho arguido na’in rua seluk,  arguido Francisco Soares Borlako nu’udar Diretór Nasionál Aprovizionamentu iha Ministériu Finansa, momentu ne’ebá, deklara ba Tribunal katak, desizaun sosa karreta prado ba PN nia la hatene, maibé halo tuir de’it eis MF Emilia Pires nia orientasaun.

Arguido Francisco Soares Borlako hateten, kondisaun Governu ho PN hola desizaun sosa tan karreta prado ba PN tanba momentu ne’ebá membru PN balun sa’e de’it motor ho taxi ba Parlamentu.

Notísia Relevante : TDD Adia Hikas Kazu Vicente Guterres

“Ha’u nu’udar Diretór Nasional Aprovizionamentu iha Ministériu Finansas simu de’it orientasaun hosi eis Ministra Finansa, Emilia Pires no maun boot Kayrala Xanana Gusmão nu’udar Primeiru-Ministru momentu ne’eba,”  tenik arguido Francisco Borlako iha audiénsia julgamentu, ohin.

Nia hatutan, iha momentu ne’ebá orsamentu ne’ebé mak aloka ba sosa karreta prado ho montante millaun $1.2 tanba ne’e  tenke hetan aseitasaun no asinatura husi Primeiru-Ministru ho Ministra Finansa.

Kona ba alterasaun karreta hosi prado ba karreta mitsubshi, nia parte hatene katak karreta prado mak sei too ba deputadu sira tuir kontratu laran no kona-ba karreta mitsubshi mak mai fali kompeténsia Parlamentu Nasional, Ministériu Finansa no Primeiru-Ministru nian.

“Antes nee mós, ha’u la haree dokumentu transferénsia ruma hosi prado ba fali mitsubshi no alterasaun nee rasik ha’u nia parte mós la iha koñesimentu,” hateten Francisco Borlako.

Iha audiénsia julgamentu antes ne’e, arguido Vicente Guterres, hanesan eis Prezidente Parlamentu Nasionál nega faktu hodi dehan, nia la sala.

 “Los duni iha orsamentu inisiál 2008 PN aprova, $910,000.00 hodi sosa karreta 27 atu distribui, karata tolu ba ema ida espesializa permanente, ida ba prezidente komisaun, vice prezidente komisaun no mós ba komisaun balu no ida ne’e mós ha’u laiha koñesimentu, tanba prezidente PN matebian Fernando La Sama de Araújo mak hatene,” afirma arguido Vicente Guterres.

Iha deklarasaun arguido defende an barak, tanba hatete kona-ba prosesu hotu nia rasik laiha koñesimentu, tantu kona-ba karreta Prado troka ho karreta seluk.

Nia hatete dokumentu antes nia mak asina hanesan prezidente parlamentu maibé ida ne’e mós hetan orientasaun hosi La Sama,
Tanba ne’e ikus haree karreta tama mai iha fulan 04 Jullu 2012 sira halo alterasaun dokumentu sosa karreta tanba karreta mai la’ós Toyota Prado maibé ne’e Mitsubishi Prado.

Audiénsia julgamentu ba kazu ne’e sei adia ba fali ba iha loron 31 outubru 2019,  tuku 09:30 Otl, hodi kontinua rona deklarasaun hosi testemuña sira hosi arguido Vicente Guterres no kontinua rona testemuña sira seluk iha loron 29  Novembru 2019, tuku 14:00 OTL.

Julgamentu nee prezide hosi juiz koletivu, Afonso Carmona, Antonio Fonseca, Evangelino Belo, no Ministériu Públiku, Jacinto Babo, arguido sira hetan asisténsia husi advogadu privadu, Jose Pedro Camões, Jose Guterres no advogadu privadu internasionál ida.

Akuzasaun Ministériu Públiku

Akuzasaun Ministériu Públiku nian, hatete iha 2008, PN iha dotasaun orsamentál inisiál ida ba akizisaun veíkulu/karreta ho montante $910,000.00.

Orsamentu ratifikasaun aumenta ba $1.400.000.00 (dolar Amerikanu Millaun atus ida-atus hat) ne’e ba dotasaun orsamentál ba karreta hamutuk $2,310,000.00 ( osan dolar Amerikanu millaun atus rua, atus tolu sanulu).

Iha tinan 2018, Prezidente Parlamentu Nasionál assume mós funsaun hanesan Prezidente Repúblika interinu, Vicente Guterres.

Iha loron 3 Marsu 2008 kompañia Midori Motors, aprezenta ba diretór nasionál PN nian kona-ba proposta akizisaun nian ida ba karreta 65 ho marka Toyota land Cruiser ho valor $2.171,000.00 no folin hosi kada karreta $33.400.00 (osan dolar amerikanu rihun tolunulu resin tolu, atus haat).

Tuir proposta ida ne’e pagamentu sei fahe ba prestasaun rua, primeiru prestasaun ho valor $910,000.00, tuir prestasaun ho valor $1,261,000.00 ne’ebé sei kobra hosi orsamentu ratifikasaun tinan 2008.

Iha loron 9 Abríl 2018, arguido Vicente Guterres, fó sai despaixu ho proposta ida ne’e iha termu sira hanesan, hafoin analiza proposta barak ne’ebé aprezenta ona, ba prezidénsia meza PN nian, aseita proposta ida ne’e kona-ba produtu ho nia folin, ba diretór nasionál atu dilijénsia hodi bele hetan ajustamentu direitu.

Iha loron 10 Abríl tinan 2008 arguido Vicente ho arguido JA asina justifikasaun ida kona-ba ajusta direitu ho kompañia Midori Motors, hodi alega katak sira halo tiha ona inspesaun merkadu nian ho kompara folin no karakterístika karreta sira nian, no kompañia ida ne’ebé mak aprezenta proposta. Justifikasaun ida ne’e haruka ba arguido Francisco Soares Borlako.

Iha loron 11, Abríl 2008 PN emite CPV númeru 8PR991154BCD no rekuzasaun kompara nian ba akizisaun karreta Toyota Land Cruiser Prado 26, ho valor $910.000.00.

Iha loron 5 fulan Maiu 2008 arguido Vicente informa ba Ministra Finansas, Emilia Pires, katak desizaun atu ho karreta ne’e, sira hola tiha ona hosi meza parlamentu nasionál nian hafoin konsulta tiha bankada hotu katak pagamentu sei halo iha prestasaun dala rua, primeiru ho valor $910.000.00 no segundu $1,261,00 no sei selu ho verba ne’ebé sei inskreve iha orsamentu suplementár.

Iha loron 3 fulan Juñu 2018 halo hikas fali kontratu foun no númeru 84063 ho Ministériu Finansas no kompañia Midori Motors hodi halo finansiamentu ba karreta ho marka Toyota Land Cruiser Prado 27 ho valor $910.000.00, karreta hirak ne’e tenke entrega iha loron 30 fulan Juñu 2008 no kontratu hirak ne’e asina iha loron 11 fulan Juñu 2008 hosi kompañia Midori Motors, Kim Jung woo, ho Primeiru-Ministru, Xanana Gusmão.

Hosi data ne’e depois emite tiha orden sosa nian númeru 84347 hodi Midori Motors nia naran, ba akizisaun karreta marka Toyota Land Cruiser Prado 27 katak iha data ne’e tenke entrega, maibé ida nee la aprova hosi ministra finansas.

Hosi aktu sira ne’e konsidera hamosu prejuizu boot ba osan estadu nian, katak loos duni artigu 37 hosi dekretu lei númeru 10/2005 loron 21 Novembru, hatete prosedimentu aprovizionamentu nian ne’e admetidu  impoin mós konkursu públiku obrigatóriu ba akizisaun sira ho valor hanesan ka superior hosi $100.000.

Ida ne’e konsidera katak nein sirkunstánsia ida hosi hirak ne’e arguido sira laiha kompeténsia au aprova osan sira ho valor boot.
Arguido sira viola prinsípiu transparénsia no publisidade nian ne’ebé obriga katak kritériu adjudikasaun nian tenke define loloos iha momentu interior hosi prosedimentu no sei hetan garantia informasaun ba interesadu sira. Tanba ne’e, Ministériu Públiku konsidera arguido Vicente Guterres ho Francisco Soares Borlako komete krime Partisipasaun Ekonomia iha negósiu artigu 299 KP, no artigu 2 lei Indonézia nian kontra korrupsaun.

Jornalista : Domingos Piedade Freitas

Editór      : Francisco Simões

HAKEREK NO HATÁN

Please enter your comment!
Please enter your name here