Tribunál Distritál Dili. Imajen/TATOLI

DILI, 18 setembru 2019 (TATOLI) – Tribunal Distritál Dili (TDD), adia hikas julgamentu ba kazu eis Prezidente Parlamentu Nasional Vicente Guterres tanba  juis Jumiaty Freitas ne’ebé antes nee deside ona hodi kaer prosesu refere tenke muda ona ba Tribunal Distritál Baucau.

Ho desizaun ne’ebé fó sai husi TDD, ohin, maka prosesu ne’e sei halo fali redistribuisaun, no agora daudaun seidauk hatene loloos prosesu nee monu ba iha juis ne’ebé nia liman. Tanba juis antes ne’ebé kaer prosesu nee, atualmente tuir hela formasaun iha Portugal.

Relasiona ho adia nee, tribunal mós seidauk deside loron julgamentu nian, tanba prosesu refere seidauk monu ba juis prosesu nia liman laran.

 “Kazu nee adia sem data tanba juis ne’ebé antes nee deside hodi kaer prosesu nee muda fali ba iha Tribunal Baucau, nia mós sei tuir hela formasaun iha Portugal,” esplika ofisial justisa ida iha TDD ba Ajénsia TATOLI.

Iha fatin ketak, Prezidente Asosiasaun Majistratura Judisiál Timor Leste Antonino Gonçalves dehan,  relasiona ho Juis nain haat ne’ebé husi TDD muda ba iha Tribunal Baucau no Suai, prosesu ne’ebé durante sira kaer hela bele pasa ba juis ne’ebé mai troka sira.

Baibain nee prosesu sira nee pasa fali ba juis ne’ebé atu mai troka sira, nee di’ak liu tan, tanba se halo distribuisaun sei fahe fali, maibé se pasa de’it di’ak liu tan,” esplika Antonino Gonçlaves

Hatán kona-ba kazu eis Presidente Parlamentu Nasional, Vicente Guterres nian,  mós  hanesan tanba antes nee juis prosesu Jumiaty Freitas,  maibé nia muda ona ba Baucau prosesu nee bele pasa ba juis ne’ebé troka nia.

Jornalista : Domingos Piedade Freitas

Editór       : Francisco Simões

 

HAKEREK NO HATÁN

Please enter your comment!
Please enter your name here