Karreta Prado Parlamentu Nasionál. Imajen/Espesiál

DILI, 21 outubru 2019 (TATOLI) – Tribunal Distritál Dili (TDD), ohin, kontinua hala’o julgamentu ba kazu sosa karreta prado Parlamentu Nasionál (PN) ne’ebé deskonfia envolve arguido VG,    JRA ho FCS nu’udar ‘ema boot’ iha órgaun lejizlativu iha tinan 2008.

Notísia Relevante : TDD Adia Hikas Kazu Vicente Guterres

Ministériu Públiku konsidera arguido na’in tolu (3) komete krime Partisipasaun Ekonomia iha negósiu artigu 299 Kódigu Penal, no artigu 2 lei Indonézia nian kontra korrupsaun.

Iha kontinuasaun audiénsia julgamentu ne’e,  arguido JRA ne’ebé momentu ne’ebá asume funsaun importante iha ezekutivu PN nian deklara hodi nega hotu faktu  ne’ebé Ministériu Públiku akuza nia tanba tuir nia prosesu hotu ba kompras karreta prado ba membru Parlamentu Nasional sira tempu ne’ebá hetan orientasaun hosi eis Prezidente Parlamentu Nasionál Saudozu Fernando La Sama de Araújo.

Arguido JRA dehan, ho nia pozisaun momentu ne’ebá iha koñesimentu ba prosesu aprovizionamentu atu sosa karreta prado ba Komisaun espesializada permanente sira atu halo fiskalizasaun iha terrenu.

Orsamentu ne’ebé aprovadu ba prosesu sosa karreta prado ho valor $910.000.00 ba membru komisaun espesializada, katak la’ós ba hotu membru PN na’in 65.

Arguido JRA haktuir, kona-ba mudansa proposta atu hola tan karreta ne’e, nia la hatene, no ida mudansa folin karreta ne’e mós parte kompañia no Ministériu Finansa mak hatene, tanba aprova osan hosi ne’ebá.

Nia dehan depois hare mudansa ne’e, iha momentu ne’ebá hetan orientasaun hosi Saudozu Fernando La Sama de Araújo atu buka karreta seluk ne’ebé nia folin baratu. Maibé nia dehan, orientasaun ne’e liu hosi verbal de’it, la’ós despaixu eskrita ruma, tanba ne’e atu kumpre ida ne’e nu’udar diretór lao no buka karreta sira hosi kompañia fornesedór karreta ida iha Japaun. Nune’e, fila mai, iha loron 4 jullu 2008, halo alterasaun ba proposta kontratu ba karreta ho folin baratu ne’e.

Entaun iha nia mandatu ne’e, konsege hola duni Karreta Prado rua, mini Bus rua, Motor Supra 12 no motor Mega pro rua, no osan restu hosi alokasaun ne’e devolve hikas ho montante $26,600.00 ba kofre estadu.

 “Iha deklarasaun ne’e ha’u hatene katak maun La Sama, agora daudauk iha ne’e no akompaña ami iha julgamentu, tanba matebian tiha ona, maibé saida mak ha’u kolia tuir duni orientasaun maun La Sama nian,” arguido JRA hateten.

Rona tiha deklarasaun ne’e, tribunal adia julgamentu  ba loron 22 outubru, tuku 15:00 OTL, hodi rona deklarasaun arguido FCS, hanesan eis Sekretáriu Estadu Fortalesimentu Institusionál, no assume kargu Diretór Nasionál Aprovizionamentu iha Ministériu Finansas.

Audiénsia ne’e prezide hosi juis, Afonso Carmona, Antonio Fonseca, Evangelino Bello, no Ministériu Públiku reprezenta prokuradór, Jacinto Babo, arguido sira hetan asisténsia hosi advogadu privadu, Elizabeth Pereira, Jose Pedro Camões ho José Guterres.

Jornalista : Domingos Piedade Freitas

Editór       :  Francisco Simões

 

HAKEREK NO HATÁN

Please enter your comment!
Please enter your name here