Diretor Jeral MOP, Rui Hernani. Imajen/Florêncio Miranda Ximenes.

DILI, 21 outubru  2019 (TATOLI) – Diretór Jerál Ministériu Obra Públika (MOP), Rui Hernani, hatete ekipa Unidade Jestaun Projetu (PMU, sigla inglés) liberta ona rai kilómetru 10 hodi entrega uluk ba kompañia China Overseas Engineering Group (COVEC) atu  halo konstrusaun estrada Baukau no Vikeke.

“Governu liuhusi MOP entrega uluk rai kilómetru 10 husi Baukau bá Venilale no atu entrega tan rai iha Venilale bá Vikeke mós ho kilómetru 10 ba empreza ne’e atu hahú reabilitasaun tanba rai ne’e livre husi abitante afetadu sira”, Diretór Jerál Rui Hernani ba Ajénsia Tatoli, iha knaar fatin Faról, ohin.

Diretór Jerál ne’e dehan reabilitasaun ne’e tenke pur etapa, tanba abitante barak afetada, ne’ebé ekipa PMU-MOP halo identifikasaun uluk ba rai ne’ebé livre hodi entrega uluk ba empreza atu reabilita.

Nia salienta tuir loloos, Governu tenke hala’o identifikasaun ba rai no liberta hotu mak entrega ba empreza atu hala’o reabilitasaun, maibé prosesu identifikasaun dezde uluk kedan hanesan ne’e ona, entaun presiza reabilita fazeadamente.

“Ne’ebé ita identifika no liberta ona balun hanesan rai livre entaun entrega ba empreza, pois mak hala’o identifikasaun fazeadamente hodi entrega pedasuk-pedasuk ne’ebé através obra ne’e atrazadu tanba problema rai”, katak.

Nune’e, Ekipa PMU-MOP no ekipa liña ministeriál hahú finaliza ona konsulta públika no sei kontinua ba faze identifikasaun hodi fó indemnizasaun hodi empreza bele hala’o ona reabilitasaun.

“Kona-ba ai-horis ne’e Ministériu Agrikultura mak responsabiliza, rai ne’e Terras no Propriedade no uma responsabilidade MOP nia ne’ebé ita hein dadus identifikasaun”, katak.

Antes ne’e, Koordenadór Jerál Tékniku PMU-MOP, António da Costa Cruz,  hatete ekipa PMU halo ona sosializasaun ka konsulta públika ba rekizitu indemnizasaun ho abitante afetadu sira ba konstrusaun estrada Baukau bá Venilale no Venilale bá Vikeke.

“Ami planu sei finaliza iha fulan ida ho balun tan (outubru to’o novembru) kona-ba prosesu sosializasaun ka konsulta públika ba komunidade afetadu sira atu valida fó kompensasaun”, António da Costa Cruz afirma.

Koordenadór Jerál Tékniku ne’e relata iha prosesu konsulta públika ne’e, ekipa PMU-MOP sosializa mós rekizitu ka padraun ne’ebé Governu iha atu fó kompensasaun ba abitante afetada sira.

“Ita konsulta inan-aman sira ne’ebé afetadu hodi troka hanoin, atu kona ai-horis karik, selu ho osan hira no kona uma karik ho osan hira, tanba kona ai-horis ne’e Ministériu Agrikultura no Peska mak atende no uma ne’e MOP mak selu tuir padraun ne’ebé iha ona”, katak.

Sobre totál abitante afetada, nia dehan finaliza konsulta públika mak foin iha dadus ba abitante hira no totál orsamentu hira mak presiza aloka ba indemnizasaun.

Projetu konstrusaun estrada nasionál Baukau-Venilale no Venilale-Vikeke kilómetru 58-resin, ka’er husi kompañia COVEC ho orsamentu millaun $44 ho durasaun tinan tolu hahú husi agostu 2019 to’o fevreiru 2022.

Orsamentu ba Projetu estrada ne’e fundu empréstimu husi Banku Aziátiku Dezenvolvimentu (ADB, sigla inglés).

Notísia relevante : MOP-MJ Hahú Halo Levantamentu Dadus ba Abitante Afetada Projetu Estrada Baukau-Vikeke

MOP Sosializa Ona Rekizitu Indemnizasaun ba Abitante Baukau-Vikeke

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here