Sekretáriu Estadu Ambiente, Demétrio do Amaral de Carvalho, emite Sertifikadu lisensiamentu ambientál ba projetu reabilita estrada Baukau to’o Vikeke, Koordenadór Jenerál Tékniku-PMU, MOP, António da Costa Cruz. Imajen/ Florencio Miranda Ximenes.

DILI, 18 outubru  2019 (TATOLI) – Koordenadór Jerál Tékniku Unidade Jestaun Projetu (PMU, sigla inglés) Ministériu Obra Públika (MOP), António da Costa Cruz, hatete ekipa PMU halo ona sosializasaun ka konsulta públika ba rekizitu indemnizasaun ho abitante afetada sira ba konstrusaun estrada Baukau-Vikeke.

“Ami planu sei finaliza iha fulan ida ho balun tan (outubru to’o novembru), kona-ba prosesu sosializasaun ba komunidade afetada sira atu valida fó kompensasaun hodi hahú ona konstrusaun”, António da Costa dehan hafoin simu sertifikadu lisensiamentu ambientál ba reabilitasaun estrada Baukau to’o Vikeke ne’ebé Sekretáriu Estadu Ambiente emite iha Bebora, ohin.

Koordenadór Jerál ne’e friza iha prosesu konsulta públika ne’e, ekipa PMU-MOP hato’o mós rekizitu ka padraun ne’ebé Governu iha atu fó indemnizasaun ba abitante afetada sira.

“Ita konsulta inan-aman sira ne’ebé afetadu hodi troka hanoin atu kona ai-horis karik, selu ho osan hira no kona uma karik ho osan hira? Tanba kona ai-horis ne’e Ministériu Agrikultura no Peska mak atende no uma ne’e MOP mak selu tuir padraun ne’ebé iha ona”, katak.

António da Costa Cruz  adianta, ohin,  simu tan lisensamentu ambientál ne’e rekizitu fundamentál atu hahú konstrusaun iha terrenu, tanba lansamentu fatuk dahuluk realiza ona iha agostu.

“Ami simu  sertifikadu katak prosesu ida ne’e kumpre ona rekezitu ida ona, ne’ebé agora ita foku ba atu  kompensa ita-nia komunidade afeitada finaliza, bele hahú konstrusaun”, nia afirma.

Kona-ba totál abitante afetada, nia dehan, finaliza tiha konsulta públika mak foin iha dadus hira no totál orsamentu hira mak presiza aloka ba indemnizasaun.

Antes ne’e, Ministru Obra Públika Salvadór Eugénio Soares dos Reis Pires husu ba autoridade lokál, komunidade,  veteranu no joven sira iha munisípiu Baukau no Vikeke ne’ebé hela besik estrada ibun atu servisu hamutuk ho ekipa PMU-MOP bainhira halo levantamentu dadus ba abitante sira.

Proteju konstrusaun  estrada  nasionál Baukau-Venilale no Venilale-Vikeke Kilómetru 58-resin, ka’er husi kompañia internasionál China Overseas Engineering Group-COVEC ho orsamentu millaun $44 ho durasaun tinan tolu, hahú husi agostu 2019 to’o fevereiru 2022.

Orsamentu ba projetu estrada ne’e, fundu empréstimu husi Banku Aziátiku Dezenvolvimentu (ADB).

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here