Ministru Obra Públika, Salvador Soares dos Reis Pires. Imajen: TATOLI.

DILI, 10 setembru 2019 (TATOLI)- Ministru Obra Públika, Salvador Eugénio Soares dos Reis Pires, informa Ministériu Obra Públika (MOP) liuhusi Unidade Jestaun Projetu (PMU, sigla inglés) ho Ministériu Justisa (MJ) liuhosi Sekretáriu Estadu Terras no Propriedade hahú halo levantamentu dadus ba abitante afetada sira ba projetu konstrusaun estrada Baukau-Venilale no Vikeke.

“Ita tenke servisu ho Ministériu Justisa ba levantamentu dadus ba ita-nia rezidente no ai-hun abitante sira, ne’ebé orsida pagamentu ne’e liuhosi ita-nia Sekretariadu Grande Projetu. Tanba ne’e parte husi Fundu Infraestrutura nian ne’e Komesa iha ona mobilizasaun hamutuk ho PMU”, Ministru Salvadór hatete iha edifísiu Ministériu Finansa, Aitarak-Laran, ohin.

MOP lansa fatuk dahuluk ba projetu konstrusaun estrada trosu rua hahú husi Baukau bá Venilale no Venilale ba Baukau iha loron 9 agostu.

“Normálmente kompañia simu notifikasaun depois lansamentu ne’e sira iha loron 70 atu halo mobilizasaun”, katak.

Tanba ne’e, Ministru Salvadór kontinua husu ba Prezidente Autoridade Munisípiu Baukau no Vikeke, autoridade lokál husi suku no aldeia, liuliu abitante afetada sira atu kontribui ba prosesu levantamentu dadus hodi hafasil konstrui estrada ne’e.

“Ita atu selu ne’e depende ba levantamentu dadus tékniku”, akresenta.

Ministru salienta, normalmente Governu mós iha padraun ba indenizasaun, maibé hein ekipa téknika sira halo levantamentu lai.

“Ita mós iha padraun ba kada item hanesan ai-hun ka kiós kada metru kuadradu ne’e selu hira, maibé ita hein dadus tékniku sira iha para sai hanesan baze atu halo kalkulasaun para indeniza ba ita-nia rezidente sira ne’ebé afetadu”, tenik.

Hatán ba padraun indenizasaun Governu kada item, nia dehan labele fó sai tanba bele hamosu preokupasaun abitante afetada sira, maibé ita sei selu tuir padraun no dadus tékniku levantamentu”, nia afirma.

Projetu estrada trosu ne’e kilómetru 58, pakote Baukau bá Venilale kilómetru 23, 38 no Venilale bá Vikeke kilómetru 34, 62 ho totál orsamentu millaun U$44. Obra ne’e ka’er husi kompañia internasionál China Overseas Engineering Group (COVEC) ho durasaun obra to’o 2022.

Orsamentu ne’e mai husi empréstimu husi Banku Dezenvolvimentu Aziátiku (ADB, sigla inglés) no liuhosi konkursu públiku husi Komisaun Nasionál Aprovizionamentu no hetan ona vistu préviu husi Kámara Konta.

Notísia relevante : Abitante Ne’ebé Afeta ba Konstrusaun Estrada Baukau-Vikeke sei Hetan Indemnizasaun

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here