DILI, 21 outubru 2019 (TATOLI)-Serbisu Korpu Bombeiru Nasionál to’o oras ne’e, seidauk iha ekipamentu pezadu hodi tulun Bombeiru atu halo atuasaun ba kazu inséndiu ahi han rai no plantasaun.
Notísia Relevante: Bombeiru Sei Enfrenta Limitasaun Maske Kompleta Ona Tinan 19
Komandante Korpu Bombeiru Munisípiu Dili, Fernando da Costa, rekoñese difisil kuandu atende kazu inséndiu ahi han rai no plantasaun ho eskalaun boot tanba ne’e presiza ekipamentu pezadu inklui elikópteru.
“Ho karreta Bombeiru ita hala’o atuasaun difisil tanba ahi han ho eskala boot kuandu iha foho ka ai-laran no difikuldade ba ami no risku kuandu ita ataka ahi boot demais anin lori fila-fali bele perigu mai ami nia vida,” hateten Fernando da Costa ba TATOLI, ohin, iha nia kna’ar fatin Caicoli, Dili.
Notísia Relevante:Inséndiu ho Anin Boot Estraga Uma 572 iha Munisípiu Haat
Nia konta tuir esperiénsia inséndiu akontese iha Postu Hatulia no Munisípiu Liquiça, foin lalais, uza de’it hudi tahan no ai-tahan hodi hamate ahi, tanba ne’e susar tebes ba ekipa sokorru atu halo atuasaun.
Notísia Relevante:Governu Distribui Apoiu ba Vítima Inséndiu iha Liquiça ho Ermera
“Se bele estadu hanoin oinsá haree elikópteru ba bombeiru hodi halo intervensaun karik ho situasaun sira ne’e akontese,” Fernando hateten.
Korpu Bombeiru Munisípiu Dili ninia serbisu durante ne’e kobre mós Munisípiu Liquiça no Ermera ho nia membru hamutuk 37, mane 34 no feto haat.
Diresaun Bombeiru iha ona rekursu umanu ne’ebé preparadu tanba antes ne’e tuir ona formasaun nivel báziku ba tékniku sokorru hanesan hamate ahi, evakua vítima sira bainhira mosu kazu inséndiu iha rai, kazu mout iha tasi, mota no seluk tan.
Notísia Relevante:Governu Alerta Atu Kuidadu Ho Inséndiu
Komandante Korpu Bombeiru Munisípiu Dili, Fernando da Costa, relata tan diresaun Bombeiru iha karreta operasaun hamutuk 12 maibé rua avaria kleur ona.
Jornalista : Nelson de Sousa
Editór : Francisco Simões
