Sekretáriu Estadu Protesaun Sivíl (SEPS), Alexandre de Araújo, halo observasaun direita ba area ne'ebé ahi han iha Ermera ho Liquiça. Imajen/Mídia Gabinete SEPS

DILI, 04 outubru 2019 (TATOLI)-Sekretáriu Estadu Protesaun Sivíl (SEPS), ohin, distribui apoiu emerjénsia ba vítima inséndiu ahi han uma komunidade hamutuk 28 iha Suku Asumanu, Postu Administrativu Bazartete, Munisípiu Liquiça.

 Notísia Relevante:Ahi Han Uma 200-resin no Ema Nain Tolu Kanek

SEPS, Alexandre de Araújo distirbui apoia emerjensia ba vitima inséndiu iha Ermera ho Liquiça. Imajen/Mídia Gabinete SEPS

Apoiu emerjénsia hanesan mós governu distribui ona ba uma kain 200-resin ne’ebé sai vítima ba inséndiu ne’e iha Suku Urahou, Mauhubu  no Lisapat ne’ebé pertense ba Zoba B Postu Administrativu Hatulia Munisípiu Ermera, kinta (03/10/2019).

“Sábadu ho Domingu, ami bele konklui ona apoiu emerjénsia ba vítima sira afetadu husi inséndiu ne’e,” informa Diretór Jerál   Sekretáriu Estadu Protesaun Sivíl, Superintendente Asistente Polisia, Ismael da Costa Babo, hodi responde TATOLI, ohin, via telefone.

Apoiu emerjénsia ne’ebé distribui ona, hanesan foos, mina, supermi, tasu, sana, lona no seluk tan.

Ismael Babo da Costa Babo hatete, ekipa serbisu kontinua halo verifikasaun dadus ba vítima inséndiu ho uma hirak ne’ebé ahi han iha Munisípiu Ermera no Liquiça nian atu hetan dadus loloos nune’e bele hetan apoiu materiál konstrusaun husi Governu.

 Notísia Relevante:Faustino Informa ba Xefe Estadu Ahi Han Uma 102 iha Urahou

Xefe Suku Urahou, Postu Administrativu Hatulia, Munisípiu Ermera, Alberto Soares, informa  mós katak,  ninia populasaun uma kain 87 maka hetan ona apoiu emerjénsia  no balun seidauk tanba ne’e husu Governu atu kontinua fó apoiu.

Autoridade Lokál ne’e dehan, vítima hirak ne’e balun sei hela ho família no balun harii ona fatin provizóriu hodi hela.

Jornalista :  Nelson Souza

Editór       :  Francisco Simões

HAKEREK NO HATÁN

Please enter your comment!
Please enter your name here