Ahi han rai iha foho lolon Munisípiu Ainaro ne’ebé halo ahi-suar nia latun anin lori ba monu iha Munisípiu Ermera no Munisípiu Bobonaro parte Suku Hauba. Imajen/Eugénio Pereira

DILI, 09 outubru 2019 (TATOLI)-Anin boot ne’ebé akontese durante primeiru semana (loron 1 too 6 outubru), hamosu inséndiu boot iha foho lolon Munisípiu Ainaro no hamosu ahi suar ho anin lori nia latun semo ba monu no han ai-laran tuan iha Munisípiu Ermera, Bobonaro inklui Liquiça, hodi rezulta komunidade nia uma no kintál sira ahi han mohu.

Notísia Relevante : Ahi Han Uma 200-resin no Ema Nain Tolu Kanek

Iha Ainaro vila ahi han motuk rai iha foho lolon ne’ebé hafurak sidade Ainaro Vila. Nune’e husi Ainaro bainhira hateke fila fali ba iha foho Cablaki, Munisípiu Manufahi nian mós ahi han duut no ai horis barak iha foho lolon.

Relasiona ho inséndiu ne’e, ekipa Diresaun Nasionál Metrolojia Timor-Leste (DNMTL), ohin, hasai  alerta ida povu sira iha parte Kosta Súl atu kuidadu aan nafatin.

Notísia Relevante : Governu Distribui Apoiu ba Vítima Inséndiu iha Liquiça ho Ermera

Iha previzaun ba oin, anin huu husi intensidade moderadu ba forte iha parte Lautem, Baucau, Manatuto, Covalima, Manufahi no Viqueque nian no akompaña ho razada bele too 26 km/h.

“Alerta ba fó atensaun de’it ba iha Munisípiu sira ne’ebé maka temi ona iha leten katak, labele sunu rai arbiru, tanba bele hamosu inséndiu iha kualkér oras ne’ebé akompaña husi razada anin nian,” DNMTL nia alerta ne’ebé Ajénsia TATOLI hatutan.

Tuir kondisaun atmosférika, loron ohin, observasaun husi satélite metrolójiku  Himawari-8, nota katak oras ne’e daudaun kondisaun atmosfera estavel iha territóriu Timor laran tomak no akompaña ho kalohan liu-liu iha Munisípiu Lautem nian.

Temperatura do arvaria husi 27-29 C iha rejiaun montahosas no 30-34 C iha rejiaun Kosteiras.

Anin huu ho diresaun husi Sudeste ne’ebé ho intensidade varia husi 5-20 km/h iha kuaze territóriu Timor laran tomak.

Nune’e mós kondisaun Laloran tasi iha Costa Norte, 0.5-0.75 metru, Costa Súl, 1-1.5 metru. Nune’e Previzaun tempu, atmosfera kontinua estavel no firme iha territóriu Timor-Leste too lokraik.

Governu liu husi Sekretáriu Estadu Protesaun Sivíl (SEPS) alerta ba populasaun iha Timor-Leste liu-liu sira ne’ebé hela iha área rurál ka foho leten atu kuidadu aan iha tempu anin makas bele hamosu inséndiu iha foho lolon.

“Apela ba povu sira liu-liu sira ne’ebé hela iha foho lolon sira atu kuidadu aan, tanba dezastre inséndiu no anin ne’e mai ita la espera bele akontese,” afirma Sekretáriu Estadu Alexandrino de Araújo.

Tuir dadus inséndiu no anin ne’ebé akontese iha Munisípiu Ermera, Bobonaro no Liquiça rejista hamutuk uma 420 mak hetan sunu no estragu.

Iha  Suku Railaku, Lisapat ho Mau-Ubu, no Hatolia, Munisípiu Ermera, iha   loron 2  outubru 2019, ahi han uma no anin estraga uma  hamutuk 295 no hakanek ema ain ida.

Iha Munisípiu Liquiça rejista  ahi han uma hamutuk 28 no anin sobu uma hamutuk 17 rejista hamutuk 45 inklui ema na’in rua (2) kanek. Nune’e mós Munisípiu Bobonaro nian mós anin sobu uma  komunidade no edifísiu eskola nian ekipa sei kontinua rekolla hela dadus.

“Semana ne’e (loron 2 too 6 Outubru) mosu inséndiu ne’ebé afeta ba Munisípiu Ermera, Liquiça no Bobonaru rejista hamutuk vítima hamutuk 420  ne’e kompostu husi ahi han uma no kintál inklui anin sobu uma no eskola sira,” dehan Sekretáriu Estadu.

Ekipa Bombeiru no Diresaun Risku Nasionál Dezastre Naturaís (DNGRD), no Parseiru Mercy Corp, USAID, no Krús Vermella Timor-Leste (CVTL) tuun ona ba terrenu hodi lori apoiu emerjénsia hanesan, foos, mina, supermie, inklui materiál konstrusaun atu fasilita harii fila-fali komunidade nia uma.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here