Ekipa pezadu Munisípiu Dili nian akompaña hosi Polisia Nasional Timor-Leste, Sesta 18 Otubru 2019, sobu ona uma 36 ne'ebé konstrui iha area protezidu Lagoa Tasi Tolu. Imajen/TATOLI

DILI, 18 outubru 2019 (TATOLI) – Governu liuhosi Sekretaria Estadu Terra no Propriedade (SETP) sobu obrigatóriu uma 36 iha zona protejidu Tasi Tolu.

Notísia Relevante : Okupante Tasi Tolu Hetan Karta Deklarasaun Hosi Xefe Suku

Diretór Jerál Diresaun Nasional Terra no Propriedade, Rodrigo de Mendonça, informa, SETP sobu uma okupante ho total 36 iha Tasi tolu tanba Tasi Tolu konsidera fatin turístika, fatin relijioza no fatin serimoniál nasionál (zona protejidu).

“SETP ezekuta lei no orden katak fatin Lagoa Tasi Tolu konsidera fatin patrimóniu estadu nian,”  afirma Rodrigo de Mendonça, ohin,  bainhira remata sobu uma okupante iha Tasi Tolu, Dili.

Notísia Relevante : Muda Okupante iha Tasi Tolu, Koordenadór Jestaun Munisípiu Dili Hetan Sona

Nia mensiona katak, SETP halo evokasaun ne’e tanba interese nasionál no interese komún, basá area Lagoa Tasi Tolu nian ne’e kategoria zona protejidu ne’ebé presiza atu mellora di’ak liu tan ba interese turizmu.

Kona-ba indemnizasaun, nia parte hatán katak buat ketak ida, maibé sira hela fila fali iha rai estadu nian no rai ida ne’ebé mak fasilita hodi serimónia boot sira iha Tasi Tolu no estadu iha obrigasaun atu hadi’a buat ne’ebé laloos.

Nia dehan, depois sobu tiha uma komunidade mak SEPT kontinua aviza ba iha komunidade sira ne’ebé mak hela iha area Tasi Tolu hanesan hela iha tasi ninin lagoa 1,2,3 no fatin serimoniál nian mak husu voluntáriamente tenke husik fatin nee, se lae SETP sei sobu sira nia uma.

Lamenta  Aktu Xefe Suku Comoro

Sekretaria Estadu Terras no Propriedade (SEPT), liu husi Diretór Jerál Diresaun Nasional Terra no Propriedade, Rodrigo de Mendonça, lamenta tebes tanba Xefe Suku Comoro, Eurico da Costa, halo fila fali karta deklarasaun no ‘fa’an rai estadu’ ba okupante iha Tasi Tolu.

“Ha’u hanoin kompeténsia lei númeru 1/2003 fó kompeténsia DNTP iha Ministériu Justisa nia okos, hodi bele kontrola no administra rai estadu iha territóriu. Ami la konsidera xefe suku halo fali deklarasaun hodi fa’an rai estadu ba komunidade,” Rodrigo de Mendonça  hateten.

Nia husu ba Xefe Suku Comoro atu labele utiliza fila fali rai estadu hanesan fa’an hodi hetan fali osan, tanba iha Tasi Tolu la iha rai privadu maibé rai estadu nian.

Nia parte sei halo asaun tuir dalan mak hanesan lei no orden liuliu ba komunidade sira ne’ebé mak sai vítima ba rai estadu iha Tasi Tolu no osan ne’ebé mak karik komunidade sira lakon ona ba Xefe Suku Comoro.

Hatán ba kestaun nee, Xefe Suku Comoro, Eurico da Costa, informa katak durante nee nia parte nunka hetan osan ruma husi populasaun ne’ebé mak okupa rai iha Tasi Tolu. Foin daudauk okupante uma kain 36 mak halo kontribuisaun kada uma kain  $10.00 mak ho total  $360.00.

Xefe Suku Comoro La Marka Prezensa

Okupante Sebastina Abu, hato’o nia lamentasaun ba Xefe Suku Comoro ne’ebé la marka prezensa iha terrenu bainhira Governu mai sobu komunidade 36 nia uma iha Tasi Tolu.

“Ami hatene rai estadu nian, maibé ami iha surat lisensa husi Xefe Suku Comoro, Eurico da Costa, fó karta lisensa katak imi halo de’it ba, kuandu aban bainrua estadu presiza fatin nee, mak bele fó estadu atu halo dezenvolvimentu,” tenik Sebastina Abu.

Nia hatutan, ohin ekipa Sekretaria Estadu Terras no Propriedade (SEPT), Ministériu Obras Públikas, Polisia Nasional Timor-Leste (PNTL), mai sobu uma okupante 36,  maibé Xefe Suku a la marka prezensa hodi defende okupante sira iha Tasi Tolu.

“Kuandu ekipa sira mai sobu uma, tuir loloos Xefe Suku tenke marka prezensa hodi esplika ba membru governu sira maibé ami la harre katak Xefe Suku nia oin atu mai defende ami,” Abu hateten.

Durante nee, mós nia parte kontribui  osan administrasaun ba Xefe Suku Comoro kada uma $10.00 no total osan husi okupante $360 iha sede Suku.

Sebastina Abu informa katak hela hamutuk ho nia oan nain haat no ho bin nia oan nain rua, durante nee halo de’it serbisu ki’ik oan hodi sustenta moris hanesan fila liman.

Nia konta-tuir katak,  SETP Mario Ximenes kuandu mai iha Tasi Tolu la ko’alia ho okupante sira, no nia dehan se mak haruka hodi halo uma iha rai protejidu no sira hatán katak Xefe Suku Comoro mak haruka sira hodi halo uma.

Jornalista : Domingos Piedade Freitas

Editór        : Francisco Simões

 

HAKEREK NO HATÁN

Please enter your comment!
Please enter your name here