Ekipa pezadu Munisípiu Dili akompaña hosi Polisia Nasional Timor-Leste, Sesta 18 Otubru 2019, komesa sobu ona uma balun ne'ebé komunidade sira konstrui iha area protezidu Lagoa Tasi Tolu. Imajen/TATOLI

DILI, 18 outubru 2019 (TATOLI) –Okupante Tasi Tolu lamentavel no ofendidu ho atuasaun Governu, liuhosi Sekretáriu Estadu Terra no Propriedade (SETP) hodi hasai sira obrigatóriu  hosi zona protejidu no saran tan sira katak okupante ilegál.

Cancio Correia Soares, nu’udar okupante Lagoa Tasi Tolu.

Tuir Cancio Correia Soares, nu’udar okupante fó sasin katak, sira okupa rai iha Tasi Tolu hetan karta deklarasaun husi Xefe Suku Comoro, Eurico da Costa, no rejistu ona rai iha Sentru Nasional de Kadastru (SNC-sigla portugés).

“Ami hetan autorizasaun husi Xefe Suku Comoro, Eurico da Costa liuhosi karta deklarasaun suku no karta rejistu husi SNC  tanba ne’e fó korajen ba sira atu konstrui uma iha Tasi Tolu,” hateten Cancio Correia Soares, ba Ajénsia TATOLI, ohin, hafoin hala enkontru hodi husu klarifikasaun husi Xefe Suku, Eurico da Costa, iha Sede Suku Comoro,  Dili.

Cancio hateten, sira nia parte la satisfeitu tebes ho desizaun SETP nian ne’ebé halo eviksaun la ho karta notifikasaun. “Ami la satisfás tanba SETP mai avizu dala ida de’it, diretamente mai sobu kedas no la iha notifikasaun ba ami okupante sira.”

Uma ne’ebé Cancio Correia Soares harii iha Tasi Tolu no hetan evikasuan ne’e konstrui ho valor $2.500.

Xefe Suku La iha Koñesimentu

Xefe Suku Comoro, Eurico da Costa.

Hosi sorin seluk, Xefe Suku Comoro, Eurico da Costa, informa, nia parte mós ‘hakfodak’ ho eviksaun ne’e  SEPT la fó notifikasaun ba okupante sira, inklui la halo koñesimentu ba autoridade suku.

“Ha’u hanoin krime boot ne’ebé mak SEPT halo mak la hatún notifikasaun ba sobu uma okupante. Tuir ha’u nia hare, kuandu hatún ona notifikasaun mak halo levantamentu dadus,”  hateten Eurico da Costa.

Nia dehan, eviksaun ne’ebé mak halo hosi SEPT la ho dignu no asaun ne’ebé mak la konsidera okupante, mak nia parte konsidera la los.

“Ha’u hanoin, se Governu hasai ninia komunidade sira bele hasai, maibé tenke avizu no alerta liuhosi notifikasaun ida,” afirma Eurico da Costa.

Eurico mós esplika konteúdu karta deklarasaun katak iha Konstituisaun Repúblika Demokrátika Timor Leste (RDTL), katak sidadaun hot-hotu iha direitu ba iha rai pedasuk ida.

“Ha’u ho ha’u nia populasaun sira husu atu selu arrendamentu ba estadu, no komunidade ne’ebé mak xefe suku fó karta iha kategoria rua mak hanesan halo uma iha tempu kalan no tempu saida de’it,” nia afirma.

Nia hatutan, iha konteúdu hakerek klara katak komunidade sira hela temporariamante de’it, no la iha indemnizasaun ba sira.

“Deklarasaun nee, okupante sira halo ho konsiénsia rasik no la iha obrigatóriu husi ema seluk, ikus liuhosi ba Diresaun Nasional  Terras no Propriedade (DNTP) fó legalizasaun ba rai, tuir artigu 54 ne’ebé mak previstu iha Konstituisaun RDTL,” Eurico hateten.

Jornalista : Domingos Piedade Freitas

Editór       : Francisco Simões

1 KOMENTÁRIU

  1. Hare halot mos Indonesia sira be hela iha Kampung Alor. Sira iha Tasi tolu hasai sem notifikasaun ente sira be mai buka moris iha Timor mos lalika mangame hasai sira para halo desenvolvemento

HAKEREK NO HATÁN

Please enter your comment!
Please enter your name here