DILI, 03 outubru 2019 (TATOLI)-Komunidade Postu Administrativu Hatulia, Munisípiu Ermera no balun husi Liquiça, kuarta (02/10/2019), hakfodak no preokupa ho inséndiu ahi han uma 200-resin no rezulta mós ema nain tolu kanek iha Zona B Postu Administrativu Hatulia.
Diretór Jerál Sekretáriu Estadu Protesaun Sivíl, Superintendente Asistente Polisia, Ismael da Costa Babo, ohin, konfirma katak, dadus provizóriu ne’ebé sira nia parte simu mak uma 200-resin ho ema nain tolu kanek iha inséndiu ne’e, maibé SEPS hamutuk ho autoridade lokál no CVTL atu ba verifika loloos dadus.
Kazu inséndiu ne’e akontese iha Suku Urahou, Mauhubu no Lisapat ne’ebé hakanek vítima feto ida (tinan 40) no vítima rua seluk husi Munisípiu Luquiça.
“Bailoron naruk inséndiu ahi han rai ne’e mosu husi fronteira mota entre Munisípiu Liquica ho Ermera iha ne’ebá maka provoka ahi han rai hodi da’et to’o suku tolu ne’e,” Ismael Babo informa hodi responde Ajénsia TATOLI via telefónika.
Inséndiu ne’e akontese iha tuku 09:00 Otl; maibé SEPS foin simu informasaun iha tuku 14:00, kuarta horiseik, hodi dezloka kedas ba fatin akontesimentu.
Nia dehan, ekipa sukoru da-uluk ne’ebé dezloka ba Munisípiu Ermera, Postu Administrativu Hatulia, lidera husi Diretór Jerál Ismael da Costa Babo no Komandante Bombeiru Nasionál maka lidera ekipa bá Munisípiu Luquiça.
Daudaun ne’e, ekipa sukoru iha Liquiça konsege hamate ona ahi maibé ekipa Hatulia nian sei kontinua hamutuk ho autoridade lokál, Polisia, Bombeiru no komunidade, sei esforsu atu hamate ahi han rai ne’e tanba iha parte balun ahi sei moris.
Vítima ne’ebé hetan kanek iha kazu inséndiu ne’e hetan ona tratamentu saúde husi ekipa Bombeiru no Saúde.
Sekretáriu Estadu Protesaun Sivíl (SEPS), Alexandre de Araújo, ho ekipa distribui ona apoiu emerjénsia hanesan foos, mina, supermi, lona, sanan, tasu no seluk tan ba vítima sira iha suku tolu ne’e.
Jornalista : Agapito dos Santos
Editór : Francisco Simões
