Komandante Jerál Polísia Nasionál Timor-Leste (PNTL), Komisáriu Faustino da Costa. Imajen Tatoli/Cipriano Colo

DILI, 3 outubru 2019 (TATOLI)–Komandante Jerál Polísia Nasionál Timor-Leste (PNTL), Komisáriu Faustino da Costa informa ba Prezidente Repúblika (PR) kona-ba anin boot no ahi han uma hamutuk 102 iha Suku Urahou, Munisípiu Ermera, kuarta (2/10).

Faustino dehan, durante enkontru nia informa dezastre ne’e tanba halo parte seguransa no mós preokupa oinsá buka dalan atu asegura komunidade afetadu sira tanba lakon uma, kafé, kintál no seluk-tan.

Lee mós: Ahi Han Uma 200-resin no Ema Nain Tolu Kanek

Kona-ba dezastre ne’e, Xefe Suku Urahou, Alberto Soares ba TATOLI via telefone, ohin, hateten motivu husi ahi han uma hirak ne’e tanba anin boot hahú kedas iha kuarta horsehik tuku 8:00 to’o tuku 24:00.

Nia esplika, provizoriamente identifikasaun hatudu katak, to’o ohin, ahi han uma 102 no sobu uma 221 iha aldeia neen ne’ebé pertense ba Suku Urahou, Postu Administrativu Hatulia, Munisípiu Ermera.

Aldeia neen nee mak hanesan Manuhatu, Kaitorlou, Raimean, Laulema, Dosmagar no Hatulia Leten.

Aleinde ne’e, Alberto relata, dezastre ne’e mós da’et to’o suku viziñu sira hanesan Suku Lisapat anin sobu uma 33, iha Suku Mau’ubu anin sobu uma 25, iha loron hanesan.

Alberto espresa ninia sentimentu triste tanba dezastre ne’e mós hamate populasaun nia animál maski to’o oras ne’e seidauk identifika.

“Oras ne’e, populasaun sira ne’ebé ahi han sira-nia uma, provizoriamente balun hela ho família no balun hela iha kafé laran”, Alberto haktuir.

Nia informa katak, horisehik, parte Bombeiru, funsionáriu husi Protesaun Sivíl, Kruz Vermella, Mercy Corps no parte seguransa konsege to’o kedas iha fatin akontesimentu maibé la konsege hamate ahi, tanba rega ho manuál de’it, enkuantu ahi ne’e mosu husi rai naruk, kafé laran no ailaran tuan, aumenta ho anin boot, nune’e susar atu hamate ahi.

Autoridade lokál ne’e mós hatutan katak, kinta ne’e, Sekretáriu Estadu Protesaun Sivíl ho ekipa to’o kedas iha fatin akontesimentu hodi oferese ajudu umanitária ba vítima sira hanesan supermie, foos, mina, lona, áqua no seluk-tan atu bele distribui ba komunidade. Suku Urahou kompostu husi aldeia neen ho nia populasaun hamutuk 3.993.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here