DILI, 02 outubru 2019 (TATOLI)-Membru Polisia Nasionál Timor-Leste husi unidade Espesiál Polisia (UEP) hamutuk na’in 25, ohin, hahú enfrenta formasaun durante fulan rua (outubru-dezembru 2019) atu bele partisipa iha misaun manutensaun pás iha organizasaun Nasaun Unida (ONU).
Notísia Relevante: GNR-Polisia Austrália Kapasita Membru UEP Partisipa Misaun ONU
Membru UEP hirak ne’e maihusi sub unidade Batallaun Orden Públika (BOP), Kompañia Operasionál Polisia (COE-sigla portugés) ho Korpu Seguransa Pesoál (CSP-sigla portugés).
Komandante Operasaun Nasionál, Superintendente Xefe Pedro Belo, husu ba formandu sira atu disiplina tempu hodi aproveita formasaun ne’e, nune’e bele eleva di’ak liután koñesimentu no abilidade.
Notísia Relevante:PNTL iha Ona Rekursu ba Bomba Esplozivu
“Formasaun ne’e importante tebes tanba instituisaun, tanba kualkér ema ruma atu hola parte iha misaun Estadu nian iha mundu tenke iha kapasidade,” afirma Pedro Belo ba Jornalista sira iha kampaun UEP Bairru-Pité, Dili.
Matéria importante ne’ebé maka formandu sira sei aprende iha formasaun ne’e hanesan tékniku tátika, Língua Portugés, Língua Inglés no instrutór própriu ba misaun pás ONU.
Komandante UEP, Superintendente Xefe Afonso dos Santos informa, formasaun ne’e ba da-lima, tanba faze da-uluk to’o da-haat hala’o ona no konsege fó ona formasaun ba Polisia na’in 112.
“Ita kontinua investe prepara rekursu umanu bainhira ONU loke odamatan ona hodi husu ita atu ba partisipa, ita prontu no preparadu,” hateten Superintendente Xefe Afonso dos Santos.
Formadór ba formasaun ne’e mai husi Unidade Espesiál Polisia (UEP) ho formadór husi parseiru programa dezenvolvimentu Polisia Timor-Leste (TLPDP-sigla inglés) no Guarda Republikanu Portugal (GNR-sigla portugés).
Jornalista : Nelson de Sousa
Editór : Francisco Simões
