PNTL iha Ona Rekursu ba Bomba Esplozivu
DILI, 16 agostu 2019 (TATOLI)-Polisia Nasionál Timor-Leste (PNTL) hosi Unidade Polisia Espesiál (UEP-sigla Portugés) iha ona rekursu umanu ne’ebé toma konta ba bomba esplozivu.
Komandante UEP, Superintendente Xefe Polisia, Afonso dos Santos, hateten, seksaun ne’e ho ninia misaun maka oinsá atu deteta no harahun bomba bainhira mosu situasaun iha perigu laran.
“Seksaun ne’e ba bonba esplozivu ne’e oinsá atu harahun bomba no deteta bomba sira,” hateten Komandante UEP, ohin, ba Ajénsia TATOLI iha Bairru Pité, Dili.
Tuir nia, antes ne’e, membru hirak ne’e tuir ona formasaun espesífiku iha nasaun tolu hanesan Japaun, Indonézia no Portugal. Membru ekipa bomba esplozivu ne’e, balun kualifikadu iha báziku no balun remata nivel avansadu.
“Ba futuru ita sei haruka tan ema na’in lima hanesan ne’e hodi kompleta seksaun ne’e, tanba seksaun ne’e iha área ida sensitivu,” Afonso dos Santos.
Mezmu sei hasoru hela limitasaun rekursu umanu, maibé Komandante Unidade ne’e fiar katak ekipa ne’e preparadu hodi atende públiku bainhira mosu situasaun frajil hodi mantein pás.
Jornalista :Nelson de Sousa
Editór : Francisco Simões
