Ofisiál PNTL hosi Unidade Espesiál Polísia (UEP). Imajen/António Gonçalves

DILI, 16 agostu 2019 (TATOLI)-  Guarda Nasionál Republikana (GNR) husi Portugal no Polisia Austrália kontinua fó kapasitasaun ba membru Polisia Nasionál Timor-Leste (PNTL) husi  Unidade Espesiál Polisia (UEP-sigla Portugés) atu hola parte iha misaun manutensaun pás Agravasaun Nasoins Unida (ONU) nian.

Materia báziku iha formasaun no kapasitasaun ne’e refere liu ba protesaun direitu umanu, téknika táktika, liña komunikasaun, língua inglés, portugés no seluk tan.

Komandante UEP Superintendente Xefe Polisia, Afonso dos Santos, informa,  ho  apoiu GNR no Polisia Austrália, antes ne’e, konsege kapasita ona ajente UEP hamutuk ema na’in 110.

“Formasaun ne’e ba dala haat ona no agora ba dala lima nian sei kontinua iha setembru, tinan ne’e,” informa Superintendente Xefe Afonso dos Santos ba Ajénsia TATOLI, ohin, iha ninia servisu fatin Bairru-Pité, Dili.

Formasaun ba etapa da-lima nian sei hili husi rezultadu selesaun ho formandu hamutuk  ajente ofisiais  na’in 30 ho durasaun fulan tolu.

Nia akresenta,  formadór ba  iha formasaun ne’e mai husi  Formadores GNR no Polisia Austrália inklui mós instruktór sira husi  Ajente Ofisiais  Polisia Unidade Espesiál ne’ebé antes  partisipa formasaun hanesan.

Tuir nia katak, preparasaun rekursu umanu importante hodi korresponde pedidu ONU nian bainhira  husu  membru Polisia Nasionál Timor-Leste mós hola parte iha misaun pás iha mundu.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here