Xefe Bankada Partidu Demokrátiku, António da Conceicão. Imajen António Goncalves

DILI, 01 outubru 2019 (TATOLI) – Membru Parlamentu Nasionál (PN) husu vendedór sira iha Kampung Alor atu koopera órden Governu nian, relasiona ho instituisaun relevante sira hanesan Ministériu Turizmu, Komérsiu no Indústria (MTKI), Ministériu Administrasaun Estatál (MAE), Polísia Nasionál Timor-Leste (PNTL) no Autoridade Lokál hahú koordena ho negosiante atu muda ba área Golgota, Comoro, hahú fulan-outubru.

Governu rasik halo ona kooperasaun ho empreza China Development, atu  hahú perepara fatin iha Golgota  ba negosiante sira iha Kampung Alor nune’e negosiante sira bele muda hahú husi 1 to’o 10 outubru tinan ne’e.

Notísia Relevante: Outubru, Governu Muda Negosiante Kampung Alor ba Área Golgota

Tanba ne’e, Xefe Bankada Partidu Demokrátiku (PD), António da Conçeição, husu vendedór sira tenke koopera ho parte relevante sira tanba vendedór iha fatin seluk bele muda bainhira autoridade sira haruka muda.

“Vendedór Kampung Alor tenke hamamuk fatin tanba Governu halo kooperasaun ho empreza xineza ida investe nia-osan rasik”, tenik Deputadu Bankada Opozisaun liuhosi sesaun plenária, tersa ne’e.

Nia hatutan: “Razaun sira ita hakarak organiza sidade Dili, hakarak reforsa polítika turizmu liuhosi meiu prezervasaun Meskita Annur nu’udar sítiu relijiozu no hanesan símbolu toleránsia, protesaun sítiu ba vizita estadu ne’ebé konfesa relijiaun musulmana atu halo orasaun, liberta movimentu esesivu iha fatin ne’ebé besik embaixada, rezidénsia diplomátika no mós edifísiu públiku, no kondisiona Meskita Annur nu’udar fatin ba ema sira ne’ebé relijiaun musulmana bele ba halo kultu relijiozu”.

Deputadu ne’e haktuir, istória harii Meskita Annur tanba tulun hosi Igreja Katólika iha tempu Portugés.

“Ema Katólika ba igreja hosi fatin ne’ebé dook no tanba sira-nia fiar mak sira ba, tanbasá Embaixadór Repúblika Indonézia husu atu vendedór sira ne’e muda tenke hanoin fatin atu sira ba ibadah, será que Meskita Annur fatin atu konsentra ema hodi halo negósiu no sira-nia ibadah ne’e komplementár”, nia akresenta.

Notísia Relevante: Sahat Sitorus : Negosiante Indonéziu iha Kampung Alor Presiza Trata ho Dignu

Nia subliña, vendedór ai-funan iha merkadu Manleuana oras ne’e halerik tanba ema la sosa sira-nia ai-funan maibé tanbasá vendedór Kampung Alor lakohi muda sai.

Deputadu ne’e observa, vendedór aileba sira dalaruma fa’an hanesan hakna’ok de’it tanba ta’uk jestaun merkadu prende.

Fatin hanesan, Deputadu Bankada Frente Revolusionária Timor-Leste Independente (FRETILIN), David Dias Ximenes, konkorda ho deklarasaun polítika Bankada PD nian katak kualkér sidadaun tenke kumpre órden Estadu.

Enkuantu, Deputadu Bankada Partidu Unidade Dezenvolvimentu Demokrátiku (PUDD), António de Sá Benevides, hateten atu muda sai negosiante tantu timoroan no vendedór estranjeiru, Governu tenke prepara kondisaun ne’ebé apropriadu.

Nune’e, Deputadu ne’e espera Governu bele halo planu ida no sosializasaun ne’ebé di’ak hafoin haruka vendedór sira muda.

Nia mós konsidera pedidu Embaxadór Indonézia, Sahat Sitorus ne’ebé husu Governu atu trata vendedór Kampung Alor ho dignu, nu’udar parte ida atu proteje ninia sidadaun sira.

“Relasiona ho Embaixadór Indonézia nia pedidu ba Governu, ha’u hanoin embaixadór iha nasaun ida sempre tenta atu proteje nia ema sira, maibé fila-fali ba kompeténsia Governu nian atu deside tanba ita lakohi atu diskrimina ema sé de’it”, hateten Deputadu opozisaun ne’e.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here