Kampung Alor Dili. Imajen/Tatoli.

DILI, 25 setembru 2019 (TATOLI) – Governu liuhusi Ministériu, Turizmu, Komérsiu no Indústria (MTKI), Ministériu Estatál, Polísia Nasionál Timor-Leste no Autoridade Lokál hahú koordena ona ho negosiante  iha Kampung Alor atu muda bá área Golgota-Komoro iha outubru.

Governu halo ona kooperasaun ho empreza China Development, atu  hahú perepara fatin iha Golgota  ba negosiante sira iha Kampug Alor, nune’e negosiante sira bele muda,   hahú husi 1 to’o 10 outubru tinan ne’e.

“Ita la obriga negosiante sira atu muda husi fatin ne’e, maibé hahú 1 to’o 10 outubru presiza muda ona, karik negosiante balun lakohi bá iha Golgota sira tenke buka ona fatin seluk no balun hakarak bá, Governu fasilita sira atu muda bá iha área ne’e”, Diretór Jerál Komérsiu, Cosme Fátima Baptista da Silva, afirma iha sentru Konvesaun Dili, ohin, hafoin hala’o diálogu finál ho negosiante sira iha Kampug Alór.

Daudaun ne’e, negosiante maioria maka sidadaun Indonézia  hamutuk 207 iha área ne’e no na’in-50 aseita ona atu re-aloka ba área Golgota atu kontinua hala’o sira-nia negósiu.

“Ita-nia Governu prepara ona fatin iha Golgota ne’ebé kapás, modernu  no atraiante, ne’ebé sira (Negosiante) muda bá iha ne’ebá atividade negósiu di’ak liután kompara ho Kampung Alor”, katak.

Polítika Governu  atu re-aloka negosiante Kampung Alor, Diretór Jerál Komérsiu ne’e friza tanba Kampug Alor hanesan fatin  estratéjiku no sentru iha  Dili besik liu embaixada sira, Palásiu Prezidente Repúblika, ne’ebé labele iha konsentrasaun  barak liu ba atividade negósiu.

Ba negosiante seluk, nia dehan Governu la obriga sira tenke bá hotu iha área Golgota, maibé tenke hahú buka ona meiu hodi bele hamamuk fatin ne’e iha loron ne’ebé determina ona.

“Kuandu sira hakarak bá, ita-nia Governu sei fasilita transporte hodi tula sira (negosiante) nia sasán bá fatin refere tanba fatin (Golgota) ne’e, fatin ida dignu ba negosiante sira ne’ebé maioria sidadaun estranjeira”, katak.

Nia dehan iha lamentasaun balun husi komunidade no traballadór sira ne’ebé durante ne’e hetan benefísiu husi negosiante indonéziu sira, maibé planu ne’ebé Governu halo ona ne’e atu halo sidade Dili sai furak liuhusi polítika ordenamentu urbana.

Kona-ba fasilidade nia dehan, Governu iha responsabilidade atu fasilita sira bá iha fatin dignu hodi hala’o atividade negósiu de’it  ho seguransa ne’ebé di’ak, maibé ba kestaun atu aluga uma hela ne’e responsabilidade kada negosiante nian.

“Ita só fó fatin ida dignu ba sira atu hala’o negósiu, maibé atu hela fatin ne’e negosiante ida-idak nia responsabilidade, karik sira kontinua hakarak aluga komunidade nia uma iha Kampung Alor laiha buat ida, maibé atividade negósiu mak hapara”, dehan nian.

Porta vós Negosiante Kampug Alor,  Rosnani Makukau, dehan prontu hakruuk ba desizaun ne’ebé Governu hala’o ona, maibé  fó tempu ba sira atu hala’o diskusaun ho traballadór timoroan ne’ebé durante ne’e servisu ho sira.

“Ita hakarak muda, maibé  tenke iha kondisaun no fasilidade di’ak ba ami-nia negosiante sira tanba laiha kondisaun ami-nia ema balun hakarak fila bá Indonézia,” dehan nia.

Notísia relevante : Sahat Sitorus : Negosiante Indonéziu iha Kampung Alor Presiza Trata ho Dignu

Jornalista : Florencio Miranda Ximenes

Editora   : Maria Auxiliadora

HAKEREK NO HATÁN

Please enter your comment!
Please enter your name here